کانونی دووەم 25, 2021

ئەرشیفكردنی نوسینەكانی تابوری پێنج بۆ؟

مەشخەڵ كەوڵۆسی

 

لە وتاری پێشوودا باسمان لەپرۆژەیەك كرد بۆ ئەرشیفكردن و دۆكیۆمێنتكردنی هەموو ئەو نوسراو، لێدوان، ڤیدیۆ، گرافیك...هتد، كەلەم قۆناغەدا بڵاودەكرێنەوەو، ئامانج لێیان تێكدانی ڕیزەكانی خەڵكی كوردستان و شكاندنی ئیرادەی تاك و، تەسلیم بوونە بەداگیركەران.
لەم كورتە وتارەدا درێژە بەو بابەتە ئەدەین و وەڵامی ئەم پرسیارە ئەدەینەوە: گرنگی ئەم پرۆژەیە چییەو لەكوێدا خزمەت دەكات بە نەتەوەی كورد؟.
من پێم وایە گرنگی ئەو پرۆژەیە لەوەدایە كە دیدێكی كوردی دروست ئەكات بۆ مەسەلەكانی تایبەت بە ئاسایشی نەتەوەیی و ئاسایشی فەرهەنگی و ئارامی كۆمەڵایەتی. هاوكات دەبێتە جۆرە برێكێكی خودی بۆ بەرگرتن بەو لێشاوە بڵاوكراوەی كە دەچنە خزمەتی ئەجێندای داگیركەرانی كوردستانەوە.
ئەڵبەتە ئێمە لەم بابەتەدا پێویستە دوو پرس لەیەكدی جیابكەینەوە، پرسی ئازادی و فراوانكردنی بازنەكانی دەربڕین، كە ڕەشنوسی دەستور و یاسا و نەریتی سیاسی لەكوردستان پشتیوانی لێدەكەن، ئەڵبەت هەركەس ئەلف بایەك لە پرۆسەی ڕۆشنبیری تێبگات، هەرگیز پشتیوانی لە بەرتەسككردنەوەی ئازادییەكان ناكات لەبەر هیچ هۆكارێك ئامادەنیە پاساو بدۆزێتەوە بۆ بەرتەسككردنەوەی سنورەكانی دەربڕین.
لەمێژووی گەلانی ناوچەكەدا، لەوانەیانەوە كەخۆیان دامەزرێنەری پایەكانی دیموكراسی و نەریتی ئازادییەكانن، تاكو ئەوانەیان كە تاكو ئێستاش نەیانتوانیوە سیستەمی ئازادییەكان و دیموكراسیەتی حوكم دابمەزرێنن، هەمیشە جیاكاری كراوە لەنێوان ئەو بڵاوكراوانەی كە لەخزمەتی بنیاتنانی كۆمەڵگەو تۆكمەكردنی ئاسایشی كۆمەڵایەتی و دروستكردنی نەتەوەدان، ئەگەرچی بەدەربڕینی توند و ڕەخنەی بنیاتنەرانەی برینداركەریش بن، لەگەڵ جۆرێك نوسینی تر كە باكگراوندو ئامانج و ستراتیژ و شێوازی دەربڕین و هەناسەی ڕەخنەگرانەیان بۆ بنیاتنان نیە.
بێگومان ئەم هەڵسەنگاندن و داوەرییەش پێویستە كۆدەنگی نەتەوەیی لەسەر بێت و، یاسا ڕێكی بخات. باشترین یاساش كە پێم وایە تا ئیستا لەكوردستان نیمانە بریتییە لە "یاسای ئاسایشی نەتەوەیی" یان تیۆری ئاسایشی نەتەوەیی.
كەواتە ئەم پرۆسەیە پێویستە سەرەتا یاسا پشتیوانی بكات و كۆدەنگی كۆمەڵایەتی و سیاسی لەسەر بێت. هاوكات لەڕووی تەكنیكیشەوە، وردو بابەتی و پرۆفیشناڵانەبێت.
ئەگەر ئەم پرۆژەیە یان پرۆژەیەكی هاوشێوە نەخرێتە كار و دیسپلینی بڵاوكراوەكان نەكرێت، بەدڵنیاییەوە بەشێك لەوانەی بڵاودەكرێنەوە، خزمەتی تەواو بە داگیركەران دەكات، بەجۆرێك بەئاگا یان بێئاگا، ڕاستەوخۆ یان ناڕاستەوخۆ، زانیاری سپی سەبارەت بە كۆمەڵگەی كوردستان و خاڵەكانی لاوازی ئەم كۆمەڵگەیە، بەبێ بەرانبەر و بەبێ ماندووبوون بۆ دەزگاكانی هەواڵگری فەراهەم دەكات.
ئەوەی لێرە بووەتە مۆدیل، لێدان لەهەموو پیرۆزییەكان، لەهیچ جێگەیەكی دنیا، لەهیچ قۆناغێكی مێژووی میللەتانی تردا نابینرێت.
لەژیانی نەتەوەكانی تردا، زۆرجار ناچاربوون لەبەر برسێتی گۆشتی مردوەكانیان بخۆن، بەڵام قەت ئامادەنەبوون دێڕێك لەدژی كۆمەڵگەی خۆیان بنوسن. كەچی لەكوردستان ئەو بوێرییە دەبینین و ڕۆژانە دەیخوێنینەوە، بەبێ حساب و بەبێ هیچ جۆرە بەرپرسیارێتییەك دەخرێنە ناو فەوزای بڵاوكراوەكان.
پاساوەكان هەرچی بن، قەیرانەكان چەندە قووڵ و كەمەرشكێن بن، هێشتا ناكاتە ئەوەی ئێمەش زامەكانی نیشتمان بەسۆتر بكەین و گورز بدەین لەبەهاكانی نەتەوە. چونكە بەوە نەكێشەكان چارەسەر دەبن و، نە دەگەینە هیچ ئەنجامێك.
لەكاتێكدا بەناوی ئازادی و دیموكراسییەوەو، لەپەنای ئەوەدا كە یاسا ناتوانێ دیپسلینی كایەی بڵاوكراوەكان بكات، ڕەنگە پرۆژەیەكی لەم شێوەیە ببێتە هۆی ئەوەی كەسێك حساب بۆ ئەو ئەرشیفە بكات كە هەڵدەگیرێت بۆ نەوەكانی داهاتوو، ئیدی مۆڵەت بەخۆی نەدات لەدژی نەتەوەكەی بنوسێت و بدوێت.
* سەرۆكی ناوەندی چاوی كورد

© 2017 Hawler