کانونی دووەم 25, 2021

هوشیاری بە ڕەنگی "پرتەقاڵی"

نەسرین حەسەن

 

ڕەنگی "پرتەقاڵی" هێمای دڵخۆشی، داهێنان، سەربەرزی، سەركەوتن، هاندانە، "پرتەقاڵی" رەنگی بڕوا بەخۆبوون، هاوڕێیەتی و باشتر بوونی پەیوەندییە كۆمەڵایەتییەكانە، هێمای گەش بینی، ئازایەتی و توانای رووبەرووبوونەوە لە گەڵ راستییەكانی ژیانە.
"جیهان پرتەقاڵی بكەن" ئەمە هێمای هەڵمەتی 16 رۆژەی بەرەنگاربوونەوەی توندوتیژی دژ بە ئافرەتانە، هێمایەك بۆ گەیشتن بە ژیانێكی ئاسوودەو و بەختەوەر، چونكە توندوتیژی بەرامبەر بە ئافرەت، توندوتیژییە بەرامبەر بە كۆمەڵگە و زیانی گەورەی پێ‌ دەگەیەنێت، توندوتیژی بەرامبەر بە ئافرەت دەستدرێژیكردنە بە مافەكانی مرۆڤ كە دەبێتە هۆی جیاخوازی رەگەزی، توندوتیژی بەرامبەر بە ئافرەت لەمپەرێكی گەورەیە بۆ بەرەوپێشچوون لە هەموو بوارەكاندا، بەتایبەتی بۆ بونیاتنانی ئاشتی و ئارامی لە جیهاندا،هەر بۆیە بە وتەی سكرتێری گشتی نەتەوەیەكگرتووەكان،" تا ئەو كاتەی ئافرەت لە جیهانێكی بێ‌ ترس و دوور لە توندوتیژی و پارێزراودا نەژێت، ناتوانین بڵێین كە خاوەنی جیهانێكی دادپەروە و یەكسانین". بە پێی ئەو ئامارەی كە یۆنسكۆ ئاماژەی پێدەدات، لە هەر سێ‌ ئافرەت لە جیهاندا یەكێكیان رووبەروووی كردارێكی توندوتیژی دەبێتەوە كە فۆرم و شێوازی جۆراوجۆر لە خۆی دەگرێت، بەڵام زۆربەیان بە هۆكاری جیاوازی وەك، ترس، شەرم، تەڵاق، نەبوونی سەرچاوەی ئابووری سەربەخۆ بە بێدەنگی دەمێننەوە و لە ئامارەكاندا تۆمار ناكرێت. "تهمینە میلانی " دەرهێنەری سینەمای ئێرانی پێی وایە " توندوتیژی تەنیا ئەوە نییە ژێرچاوت شین و مۆر بێتەوە، ددانی شكاو و لوتێكی خوێناوی نییە، توندوتیژی ئەو ترس و دڵەراوكێیە كە لە ناخی ئافرەت دایە بەوەی كە پێویستە بیر لەوە بكاتەوە لاوازتر یان قەڵەوتر بێت، جوانتر دەربكەوێت، دڵخۆشتر بێت، سەنگین و گرانتر بێت، ماڵدارتر بێت و هۆشمەندتر بێت لەوەی كە هەیە، هەروەها توندوتیژی ئەو ماسكەیە كە ئافرەت رووخساری پێ دادەپۆشێ‌ تا بۆ خۆی نەبێت، بەڵكو تەنیا جێگەی رەزامەندی پیاو بێت"..
16 رۆژ هەڵمەتی بەرەنگاربوونەوەی توندوتیژی بەرامبەر بە ئافرەتان، دەرفەتێكە بۆ ئەوەی هەموومان بە دانانی هێمایەكی "پرتەقاڵی" ئەو هوشیارییە بڵاو بكەینەوە كە ئافرەت لە كۆمەڵگەیەكی هوشیار و پێشكەوتوودا گەشبین و دڵخۆشە، داهێنەرە، سەربەرز و بە متمانەیە، پەیوەندی كۆمەڵایەتی بەهێزی هەیە و ئازایانە توانای رووبەرووبوونەوەی دووژواری ژیانی هەیە، لە ژیانی خێزانیدا سەركەوتوویە و بە ئاسوودەیی خۆی دەبێت. ئەمەش بە واتای بەختەوەری كۆمەڵگەیە.

© 2017 Hawler