تشرینی یەکەم 21, 2020

هەرێمی سلێمانی، پرۆژەی سڕینەوەی ماڵی تاڵەبانی

 

مەشخەڵ كەوڵۆسی

 

پێشتر و لەچەند نوسینێكی تردا ئاماژەمان بەهەبوونی خەیاڵێكدا بۆ بەركەناركردنی ماڵی تاڵەبانی لەنێو هاوكێشەكانی هێز و حوكمداریدا، ئەوەی ئەمجارە هانی نوسینەوەی دیوێكی تری ئەو خەیاڵەیدا، ئەوەیە كە وەك دەبینین خەیاڵەكە هەنگاوێك براوەتە پێشەوەو، لەئەدەبیات و خەیاڵ و فەنتازیای سیاسی تێپەڕیوەو بووەتە پرۆژە و ئەركانەكانی ڕەشنوسی پرۆژەیەكی یاسایی تێدایە.
بەندە لێرەدا بانگەشەی ئەوەناكەم كە ئەوانەی پرۆژەكەیان ڕاگەیاندووە بەئەنقەست ئەیانەوێت ماڵی مام جەلال لەمەشهەدەكە بسڕنەوە، بەڵام دەتوانم بەبێ دوودڵی بڵێم: هۆكار و هاندەرو پاساوەكانی پشتی ئەو پرۆژەیە هەرچی بن، ئەنجامەكەی بمانەوێت یان نا، یەكسان دەبێت بە سڕینەوەی هەژمون و ئامادەگی ماڵی مام جەلال لەكۆی كایەی حوكمڕانی و سیاسی كوردستاندا، یان لانی كەم بچوككردنەوەو بەركەناركردن و قەتیسكردنی هەژمونی سیاسی و مێژوویی ئەوانە.
پێویست ناكات ئێمە بیركردنەوەی قووڵ و زیرەكییەكی زۆرمان هەبێت تاكو بیسەلمێنین پرۆژەكە بەزیانی ماڵی مام جەلال دەشكێتەوە. چونكە زەرب و دابەشكردنێكی سادە دەمانگەیەنێتە ئەو ئەنجامە!.
سەرنج بدە، لەتەواوی دنیا و لەتەواوی مێژوی سیاسی مرۆڤدا، سیاسەتمەدارەكان هەمیشە هەوڵی فراوان بوونی هەژموون و پانتایی دەستەڵاتیان دەدەن. ماڵی مام جەلالیش لەم یاسایە ڕیزپەڕنین و ئەوانیش مافی خۆیانە هەوڵی بەرقەراری و هەژمونی زیاتر و پانتایی فراوانتر بدەن. بەڵام پرۆژەكەی هەرێمی سلێمانی یەكەم ئەنجام كەلێی دەكەوێتەوە، بریتییە لەقەتیسكردنی هەژموون و دەستەڵاتی ئەو بنەماڵەیە لەناو شاری سلێمانی و چەند شارۆچكەیەكی دەوروبەریدا، لەكاتێكدا ناو سەنتەری سلێمانیش بۆ یەكێتیی مسۆگەری تەواو نیە و چەندین حیزب و ڕێكخراوی تر ڕكابەری دەكەن!.
پرسیاری سەرەكی ئەوەیە: لەسەر چ بنەمایەك ئەوە لەبەرژەوەندیی یەكێتییە؟ بەتایبەتی لەبەرژەوەندی ماڵی مام جەلالە؟ لەكاتێكدا ئەو بنەماڵەیە وەك هەموومان دەزانین لەناو خودی یەكێتیشدا بڕیاردەری یەكەم نەماون و لەئیستادا كلیل و كۆدەكانی بڕیاردان دابەش بوون و ئەوەش ئەنجامێكی سروشتی سیستەمی هاوسەرۆكییە و ئەوە كاروباری ناوخۆی ئەو حیزبەیە و كەسیش مافی ئەوەی نیە لێپرسینەوەیان لێ بكات كەبۆچی و چۆن بەو دابەشبوونە ڕازی بوون!.
بەڵام كاتێك هەژمون و دەستەڵاتی یەكێتیی دێتەوە ناوخەڵك و ڕەنگدانەوە لەسەر كایەكانی ژیانی هاوڵاتی سادەی وەك ئێمە دروست دەكات، ئەوجا هەموومان مافی ئەوەمان هەیە لەهەنگاوەكانی بپرسینەوەو، لەحیكمەتی پشتی پرۆژەكان بكۆڵینەوە.
وەك جارێكی تریش لێرەوە پرسیم: هەر بەجدی یەكێتیی حیزبی هەموو كوردستان بێت و شەریكی ڕاستەقینەی دەستەڵات بێت لەزاخۆوە تاكو كفری، باشترە بۆ ڕۆڵ وپێگەو قورسایی ئەو حیزبە، یان لە سلێمانی و چەند شارۆچكەیەكدا قەتیس بكرێت و بڕیاردەری یەكەمیش نەبێت؟.
ئەوە ئەو گرێ قووڵەیە كەپێمان وایە پێویستە یەكێتی زیرەكانە خۆی لێ دەرباز بكات، ئەگینا لەقولەی بڕیاری كوردەوە دادەبەزێت بۆ ڕكابەری كردن لەگەڵ چەند قەوارەیەكی بچوك و وردە حیزبدا كە ڕەنگە لەهەر ئیئتیلافێكی ئەو وردە حیزبانەدا بەتەواوی یەكیتیی و ئاوت بكەن.
هاوكات، پێم وایە ئەو پرۆژەیە و هاوشێوەكانی، لەناو بازنە بەرتەسكەكەی ماڵی تاڵەبانیشدا، خودی قوباد تاڵەبانی دەكەنە ئامانج و، ئەوەش بەمەبەستێك كەلەناو دەرونی یەعقوبدایە جارێ كەشفكردنی لەبەرژەوەندی هاوكێشەی سیاسی كوردستاندا نیە.
دانیشن بەخێر.

© 2017 Hawler