ئەیلول 18, 2020

شۆرشی میدیایی بە رەنگی رەش و سپی

نەسرین حەسەن

دوای ماوەیەكی زۆر لە پارانەوە بۆ كڕینی تەلەفزیۆن،دواجار رۆژێك باوكم بە تەلەفزیۆنێكی گەورەی رەش و سپی گەڕایەوە، دەتگوت ئاهەنگی بووك گواستنەوەیە، شاییی و چەپلە لێدان و گۆرانی وتن، دڵم زۆرخۆش بوو، وتم،ئۆخەی! ئەوجار بە كەیفی خۆم چاو لە تەلەفزیۆن دەكەم و تەواو ناچمە ماڵی "مینا"بۆ ئەوەی چاو لە تەلەفزیۆن بكەم و كێكیشی بۆ ناكرم .

ئەمڕۆ جیاواز لە جاران،میدیا وەك دامەزراوەیەكی گشتگیری جیهانی لایەنێكی زۆری لە ژیانی مرۆڤایەتی داگیر كردووە، بە هەموو كاریگەرییە ئیجابی و خزمەتگوزاریەكانییەوە، لەگەڵ ئەوەشدا لایەنێكی تری بۆتە مایەی ترس و تۆقاندن و دڵەراوكێ و نیگەرانی، وێنە و هەواڵی كوشتن، دەستدرێژی كردن، ئەشكەنجەدان، ئەتككردن و ناوزڕاندن لە تۆرە كۆمەڵایەتییەكان كە بە شێوەیەكی بەرفراوان بڵاوبۆتەوە، مرۆڤ دەخاتە ژێر پرسیارێكی گەورە لە ئاست مرۆڤبوونی خۆی! . لەو ماوەیەدا كەمپینی گەورەی هاشتاگی"ئافرەتان پاڵپشتی ئافرەتان" بە بڵاوكردنەوەی وێنەی رەش وسپی لە تۆری كۆمەڵایەتی ئینستاگرام لە ماوەیەكی كورتدا كاردانەوەی گەورەی بە دوای خۆیدا هێنا. ئەو كەمپینە یەكەم جار لە 18 تەممووزی ئەمساڵ لە لایەن رۆژنامەنووسی ناوداری بەرازیل"ئاناپائولا پادرۆ"رێكخرا، بە ئامانجی "كۆكردنەوەی میدیایی ئافرەتان بۆ نارەزایی دەربڕین بەرامبەر بە توندوتیژی رەگەزی " و لە ماوەیەكی كورتدا زیاتر لە 8 میلیۆن كەس بە بڵاوكردنەوەی وێنەی ئافرەتان پشتگیری خۆیان لەو كەمپینە دەربڕیوە،وێنەكان جۆراوجۆرن، هەندێك كەس وێنەی ئافرەتانی خاوەن دەسەڵات و بەهێزیان دابەزاندووە، هەندێك كەسیش بە دابەزاندنی وێنەی ئەو ئافرەتانەی كوژراون یان توندوتیژیان بەرامبەر ئەنجامدراوە، نارەزایەتی خۆیان دەربڕیوە،هەندێك لە ئافرەتە ناودارەكانی جیهانیش وێنەی خۆیان دابەزاندووە بە مەبەستی پشتگیریان بۆ ئەو كەمپینە و وەك هاندانێكیش بۆ كەسانی تر كە بەشداری لەو كەمپینە بكەن،لە دوای ئەم كەمپینە چەندین هاشتاگی تر بەو ناوە و ناویتر و بەم شێوازە دروست بوون كە پێدەچیت رۆژ بە رۆژ زیاتر بن .
ئێستا تەلەقزیۆنە رەش و سپیەكەی ماڵی باوكم باوی نەماوە، بەڵام بۆ ئەو كاتەی منداڵ بووم، شۆرشێكی گەورەی میدیایی بوو، واپێدەچێت ئەمجارەش شۆرشێكی تری میدیایی بە رەنگی رەش و سپی سەر هەڵبدات و كاریگەری باشی هەبێت لە رووبەرووبوونەوەی توندوتیژی رەگەزی .

© 2017 Hawler