تشرینی یەکەم 20, 2020

ئایا ئێمە شۆڕشمان بۆ مووچە كرد؟!

ئەسعەد عەدۆ 

رۆژانێك ئەوانەی ئێستای بەغدا چاویان لە ئێمە بوو شتێكیان بۆ بكەین، هەر گیروگرفتێكیان هەبوایە پەنایان بۆ هۆبەو هەواری ئێمە دەهێنا تا برا گەورەكانمان چارەسەرێكیان بۆ بدۆزنەوە، هەردەم پرسوڕایان بە ئێمە دەكرد. لە هیچ شوێنێك ئۆقرەیان نەبوو جگە لە ژێرحوكمڕانی سێبەری حوكمڕانی ئێمەدا، عەرەبێك نەبوو خۆزگە نەخوازێ برا گەورەی وەكو ئێمەیان هەبێت تا وڵات بەرەوپێش ببات .
بەڵام بەداخەوە كە زمانیان گەیشتەوە برینی خۆیان ئەوەی لە توانایاندا هەبوو بە ئێمەیان كرد ! چونكە یەكگربووین كاریگەری زۆر نەبوو، كاتێ دەوروبەر هەستییان بە بەرەوپێشچوونی ئێمە كرد وەك نەریتی هەمیشیەییان كەوتنە دووبەرەكی و لەتلەكردنمان . ئێمەیش وەك هەموو میللەتانی دیكە خاڵ وكەسی ترسنۆك، چاوچنۆك، لەرزۆكمان هەیە بۆیە توانیان درزێك لەو دیوارە ئەستوورەی نێوانمان دروست بكەن كە ڕەنجی هێندە ساڵەیان بەفیڕۆداین زامێكی بەزێدە دژواریان لە گیان و هزرماندا پەیدا كرد كە تا ئێستا پێوەی دەناڵێنین !.
بەداخەوە رۆژانە ئەو ئازارەی (16) ئۆكتۆبەر بەنێوماندا شۆڕدەبێتەوە تا گەیشتینە ئەو قۆناغە كە كۆمەڵگای كوردستانی بەدوو ئاراستەی سەرەكی دابەش بێت .
ئەگەرهاتوو برا گەورەكانمان رێگا چارەیەك نەدۆزنەوە بەرەوخراپتر دەچین، نەوەك لە چ دەوروزەمانێك بووە كورد حەز بە سەربەخۆیی نەكات؟. كەی بووە لە هەر قۆناغێكدا جۆرێ جاشایەتی لەنێوانماندا دروست بێت؟!.
بۆ هەوڵنەدەین رۆژانی سەرفرازیمان وەبیرخۆ ناهێنینەوە؟. لەوەتەی لاپەڕەكانی مێژوو ئاوەژوو دەكەینەوە ئەو نەوتەی لەنێو دڵی كوردستاندا دەچۆڕایەوە بە ئاگرەكەی جەستەمان دەسوتێنرا، سوپاس بۆ خوا ئەو رۆژەمان بینی كە دەسەڵاتی خۆمان بەنوێژی نیوەڕۆو بە فەرمی گرێبەستی دەرهێنان و رەوانەكردن و فرۆشتنی نەوتی خۆمان واژۆكرد . شتی باشن كرد .
هێدی هێدی بە كوێرایی نەیاران وڵاتمان ئاوەدانكردەوە، پەرلەمانمان هەڵبژارد، حكومەتن دامەزراند . خەڵك بە حەزرەتی دیدارو دیدەنیمان هاتنە كوردستان، بێ هەلە نەبووین! بەڵام توانیمان بەسەریدا زاڵ بین، كوردستان و خەڵكەكەی بۆ چەندان ساڵ لە ژێر سێبەری پەیمانی
ئیستراتیجی حەساینەوە بۆیە نەیار بێ وچان هەوڵوتەقەڵای هاتنە نێوانیان دەداین تا گەیشتینە ئەو قۆناغە زێدە دژوارە كە كوردستانیان لەسەر دواڕۆژی میللەت دڕدۆنگ بن!.
هەموو دونیا دەزانێ دەسەڵاتی خۆمان تا ڕادەیەك ژێرخانێكی بۆ كارەبا، ئاو، ئاوەدانكردنەوە، بەرگری دروستكردووە لە سەقامگیریدا داهێنانمان كردووە . فەرموون سەیری شارەكانی خۆمان و ئەوان بكەن ؟ تا ئەوڕۆ خەڵكی ئەولا ئیرەیی بە ئێمە دەبەن!. نازانم ئەو خەڵكە بۆ هێندە عەوداڵی ئەو وڵاتەن كە داری لەسەر بەردی نەماوە؟!. بەڵێ نێوێكی گەورەو وڵاتێكی وێران !!.
ئێمە پشت بەخوا خاوەن پڕۆژەی خۆمانین ئەوان دارودەستی ئەموئەون ! ئەوەی كوردپەروەران و كوردستانیانی دڵتەنگ كردوە ئەو ئاوازە نەشازەیە كە لێرەو لە وێ باس لەخۆبەدەستدانەوەمان دەكەن ! باشە چ بە مێژووی ئەو (29) ساڵەی حوكمڕانی و (100) ساڵەی شۆڕشی بەردەوامی میللەت دەڵێین ؟! لە چ دەوروزەمانێك بووە ئەوەی بە خوێن بناغەمان بۆ داناوە بە دەستی خۆمان تێكیدەین ؟ چ بە نەوەی دادێ دەگوترێ ؟ كەی كورد بیری لەوە دەكردەوە كە بتوانین نەوت دەربێنێ و بیفرۆشین ؟ كێ بیری لەوە دەكردەوە كوردستان ببێتە بارەگای سەرەكی هاوپەیمانانی دونیا ؟ كێ بە خەون بیری لە ڕیفۆاندۆم دەكردەوە؟.
راستە (64) وڵاتی هاوپەیمان دەگەڵن بێوەفا دەرچوون ئیدی سیاسەتە و بەرژەوەندی پێوەری بێوژدانیان بوو بەڵام كاتێ ئەو كوردە بە تفەنگی قۆنداغ بەگرێ دەستی بە شۆڕش كرد نەهاوپەیمان هەبوو نەبرادەر، لەو رۆژەوە هێناومانە خوێنمان بەلێشاو ڕژا، گوندن سوتێندرا !.
بەدڵیان بێ یان نەبێ هەموو ئوممەی ئیسلامی بەرامبەر بە كورد خەجاڵەتن!. چونكە فارس، تورك، عەرەب كە شانازی بە ئیسلامەتی خۆیان ئەكەن!. بابزانن بەهیچ شێوەیەك درێغیان لەگەڵ نەكردووین واتە ئێمەی كورد ئایاتی ڕبانین هەین و دەبین و هەر لێرەین!.
لە كۆتاییدا دەڵێم : كاتێ عێراق هەموو دونیای دەهەژاند ئەوە كورد بوو بە تفەنگ بەرخودانی دەكرد، كەچی ئێستا عێراق بەدەستی خۆی نیە ! ئەگەر ئێمە پارەمان بۆ (4 – 3 ) ملیۆن كەس نیە ئەوە عێراقە پارەی بۆ (30 – 20 ) ملیۆن کەس نیە، بیر لەوەش نەكەنەوە خەڵكی دەوروبەر دەتوانن بە هانایانەوە بێن. نەخێر مێژوو دەڵێ: ئەوانە بچنە نێو زگی یەكتر لە ڕقان خۆیان داوێن یەكاوی عەرەب .

© 2017 Hawler