تشرینی یەکەم 27, 2020

د. رێبین سەلام

 

بەکورتی وبە کوردی بە تەمام تیشک بخەمە سەر بابەتێکی گەورە ومەزن، مەگەر خودا یاریدەدەر ولە پشتمان بێت تاوەکو بتوانین بەسەلامەتی ئەوەی دەمانەوێت بیڵێن و وەک خۆی بگات بە فکر وبیری تیژ وژیرتان، دەنا بابەتی کوژاندنەوەی ئەستێرەی بەخت وتەختی کوردان کە لە هەزارەی سێیەمی بەر لە هاتنی حەزرەتی عیسادا گەیشتبووە لوتکە وقەڵەمڕەوی ئەو دەسەڵاتە کوردیەی لەوپەڕی سنورەکانی چین وماچینەوە دەستی پێ دەکرد هەتا کەنداوی فارس ولەملاشەوە هەتا گەروی جەبەل تایق باڵی کێشابوو، روخانی ئەم مەملەکەتە بە هۆی خەمساردی دوایەمین پاشاکانمانەوە وبەهێزبوونی حوکمڕانانی چواردەورمان، ئەوە باسێکی دوور ودرێژی مێژووییە ونابمە ئەسکوێ لە جامی مامۆستا بەرێزەکانی مێژوومان، چونکە وەستاکانی توێژینەوە مێژویەکان لە ئێمە خاستر باسیان کردووە وبە کاڵفامی خۆمان کارەکەیان لێ تێک نادەین.

ئەوەی مەبەستمانە لێرەدا تیشکێکی بچوک دەخەینە سەر ئەو داگیرکاریە فیکری وزیهنی وهونەری وسەلیقەیی وسیاسی وسایکۆلۆجی ودابی وکلتورییە کە (5000) ساڵە دژمنانی ئەم میللەتە بەردەوام کاریان تێدا کردوین وخۆشمان هەروەک کرێکاری شەیتان بە نەزانی یان زانایی قۆڵمان لێ هەڵماڵیوە کارەکەی دژمنانمان تەواو کردووە وئێستەشی لەگەڵدا بێت زۆر بە ئەمەکانە بەردەوامین وجەوهەری کلتورە رەسەنە کوردییەکەی خۆمان بە خۆڵ وخاشاکی کلتور وداب ونەریت وئایین وخوو خدەی دژمنانمان داپۆشیوە وتەنانەت زەوق وسەلیقە وپۆشاک وناوماڵ ودەرماڵمان وەردەگرین لە تورک وعەرەب وعەجەم، بەتایبەتی لە رێگەی زنجیرە دراما وەرگێڕدراوەکان بۆ زمانی کوردی، بەم شێوەیە کوردستان هەر هەمووی بە هێزی نەرم داگیراوە، بە ئەو بستە خاکەی کوردستانی عێڕاقیشەوە کە جۆرە خودموختارییەکی تێدایە، هێزی نەرم مەودا وماوەیەکی زۆری دەوێت هەتا کار دەکات بە هەمان شێوە مەودا وماوەیەکی پتری دەوێت هەتا لەکۆڵت دەبێتەوە ولێ ی دەخەڵەسێیت، چونکە هێزی نەرم (soft power) کاریگەری دەبێت لەسەر کارێکتەر وبونیادی تاک وشێوازی ژیان ورێبازی بیرکردنەوەی مرۆڤ وروانگە ودنیابینی تاک.

پێمان وایە ئازادکردنی بیری (شارنشینێک) لە ئازادکردنی (شارێک) قورسترە، کە یەکەمیان بە نەرمە پاوەر ئازاد دەکرێت و دوومیان بە رەقە پاوەر .

(عەلی وەردی) پێی وایە کە بیروباوەر و ھزری عەرەب تایبەتمەندییەکی تێدایە بریتیە لەوەی ھەر کاتێک لە جەنگێکدا سەردەکەوتن ئەو سەرکەوتنەیان بۆ ئەو فاکتەرانە دەگەڕێننەوە کە تایبەتە بە خۆیان وئەو ماندوو بوون وقوربانییەی کە لە پێناویدا داویانە، مەبەستی (علی وەردی) لێرەدا ئەوەیە کە هيچ حیسابێک بۆ فاکتەرە یاریدەدەرەکانی دەرەوەی هێزی خۆیان ناکەن وەک سروشت ورێکەوت وخاڵی لاوازی غەنیمەکانیان وکات وشوێن و....هتد بەڵکو تەنیا خۆیان وهێزی بازویان بە هۆکاری سەرکەوتن دەزانن وتاپۆی سەرکەوتنەکە دەکەن بە ناویەوە.

بە پێچەوانەشەوە عەرەب هەر کاتێک تووشی شکست بێت یەکسەر دەگەڕێنەوە بۆ ڕۆڵی داگیرکەران ودەستی بێگانە وخیانەتکار وئەڵقە لەگوێ وسیخوڕان، ئەو جۆرە ھزرکردنە بەشێکە لە کەسایەتی عەرەبی بیابان.

ئەگەر تێبینی بکەن بەرێزان ئەم جۆرە هەڵسەنگاندنە بۆ (شکست) و(سەرکەوتن) هەر یەکەمین بریاری سەرتاییمان بریتی دەبێت لەوەی کە چەند هەڵسەنگاندنێکی ناواقعی وکاڵفامانەیە هەموو سەرکەوتنێک بە تەنیا هۆکارە زاتیەکان حیساب بکەیت وهەرچی ژێر کەوتنێکیشت هاتەپێش گڕ گڕ بگەڕێیت بیخەیتە ملی هۆکارە مەوضوعیەکان، بەم شێوەیە نە ئەزمون وشارەزایی لە سەرکەوتنەکانت زیاد دەکات ونە پەند ودەرسیش لە شکستەکانت وەردەگریت.

بۆیە پێویستە زۆر بە ووریاییەوە خۆمان قوتاربکەین لەو شێوازە بیرکردنەوەیەی کە لە کلتورە عەرەبیە بیابانیە ساکارەکەوە هەزاران ساڵە نەرم نەرم لە کلتور وهزرماندا تۆو کراوە وبە بەردەوامی ئاو دەدرێت، دەبێت زۆر واقیعیانە سەرکەوتن وژێرکەوتنمان بەهەردوو ئامرازی خودی وبابەتی (زاتی ومەوضوعی) هەڵبسەنگێنین تاوەکو نە بەوەهمی سەرکەوتن پێبکەنین ونەبە وەهمی ژێرکەوتنیش بناڵین.

 

© 2017 Hawler