ئاب 12, 2020

لە شەڕی نەهەنگەکاندا حزبەکان خەریکی چین؟


هاودەنگ فاروق

 


ڕووداوگەلی زۆر هەن و کاریگەریان لەسەر کورد هەیە، بەڵام لەناو کورددا دیدێکی جیددیی هاوبەش و ڕۆشن نییە بۆ داهاتوو، بۆ نموونە
‎ئەو لایەنەی لەهەموو پرسێکی نەتەوەییدا خاوەنداریەتیێ ئەو دیدە جددییە دەکات، تەنیا پارتی دیموکراتی کوردستانە، بەڵام پارتی دیموکراتی کوردستانیش بە تەنیایە، سەرباری ئەوەش کەوتۆتە بەر ڕق و کینەی هەڵمەتێکی زاڵمانەی بێویژدانان.


هەندێک کەس و هێزی دۆڕاوی ناوخۆ، کە هیچ بەرنامەیەکیان بۆ ئێستاو داهاتووی کوردو سیاسەتی ناوخۆ و ناوچەیی پێ نییە، جگە لە بەرنامەی شێواندنی مێشكی خەڵك و كاولكردنی وڵات و گێڕانەوەی كورد بۆ خاڵی سفر، ئەوانەش لە بۆشاییدا یارییەکی خەراپ دژی میللەتی خۆیان دەکەن، لە هەموو شتێک دژی پارتین، وەکو ئینسانێکی گێژ لە ناو قەیرانی نێوخۆیاندا چەقیون و بەملاو بەولادا دێن و دەچن، جگە لە درۆ و فرڕوفیشاڵ و سیاسەتی فریودان، هیچیان نییە بیدەنە خەڵکی خۆیان.

 


‎پارتی بە پێچەوانەی هەموو حزبە کوردییەکان، لە هەموو قۆناغەکاندا، بەرنامەیەکی نەتەوەیی هەیە، سیاسەتی بۆ گشت ڕووداو و گۆڕانکارییەکی ڕۆژ هەیە، چارەسەری بۆ هەموو کێشە و تەنگژەیەک هەیە، پارتی هەرگیز لە بۆشاییدا نەخوولاوەتەوە، ئەو قەیرانە یەک لە دوایەکەی دووچاری کوردستان بوونەتەوە، بەڵام پارتی بەتەنیا ڕووبەڕوویان دەبێتەوە، پارتی کار دەکات، کەم قسە دەکات، كە قسەش دەكات هەوڵ دەدات هەموو ڕەهەندەكانی بەرژەوەندی باڵای نیشتمانی لەبەرچاو بگرێت و ئینجا لە کاتی گونجاودا قسە دەکات، چونکە، ئێستا کە هەرێمی کوردستان لە بەردەم چەندین قەیران و تەحەدی گەورەدایە، دەبێ حزبەکان خۆیان کۆ بکەنەوە یەک (سیاسەت – ستراتیژ) یان هەبێت، ئەگەر وا نەکەن، ڕەنگە بایەکی سوکیش بێت، بمانڕووخێنێت، ڕووداو و گۆڕانکاریی ناوچەکە، مەترسیی لەسەر ئێمە زیاترە، ئەگەر دەرفەتەکان بە خزمەتی خۆماندا نەقۆزینەوە، زیانی گەورە دەکەین، بۆیە نابێت تەنیا بیر لە مووچە بکەینەوە، نابێ، چاومان لە خێرو مەرحەمەتی بەغدا بین کە چیمان پێ دەدەن و چیمان پێ نادەن.

 


‎نابێ بیر لەوە بکەینەوە چەند مانگێک خۆمان بژێنین وتەواو، دەبێت بیر لەقەیرانی ئابووری و سیاسی گەورەتر بکەینەوە، لەڕووی ستراتیژییەوە، پێش ڕووداو بکەوین و بزانین، ئەگەر ئێمە لەدوای "کۆرۆنا"دا ڕووبەڕووی قەیرانێکی ئابووریی گەورە بینەوە، پێویستە چی بکەین، ئەی ئەگەر ئەو قەیرانەی ئێستاش دوو تا سێ ساڵی دی خایاند چی دەکەین؟ چونکە ئەو قەیرانە تەندرووستییە سەختە چەندە درێژخایەن بێت، ئەوا قەیرانە ئابووریەکە زیاتر دەبێت، ئێمە دەبێ تەنیا پشت بە خۆمان ببەستین، چیتر نابێ پشت بە بەغدا، یان هەر وڵاتێکی دیکە ببەستین، چونکە لەناو جیهانێکی قەیراناوی و شەڕی نەهەنگە گەورەکان، هیچ وڵاتێک بەهانای ئێمە نایێت، بگرە هەموو وڵاتان بەدەست کێشەی خۆیان دەناڵێنن، دەبێ تەنیا خۆمان حەکیمی چارەسەری بین، پشت بە هێزی گەلی خۆمان ببەستین.

© 2017 Hawler