کانونی یەکەم 16, 2019

پەیوەندی و تێكەڵاوی و لەخەڵكدانەبڕانی محەمەد پێغەمبەر

عومەر چنگیانی

 

وەكچۆن خەرمانە گوڵی دوو هەفتەی ڕابردوومان تەرخان كرد بۆ باسی "چەند هەڵوەستەیەك بە دیار پەروەردەی قورئانیەوە بۆ محەمەد پێغەمبەر – دروود و سڵاوی خوای لەسەر بێت – " لە 18ی ڕەبیعی یەكەمی 1441 بەرانبەر بە 15 ی نۆڤەمبەری 2019لەسەر دوانگەی"مزگەوتی خەدیجەكوبرا"وە گوتاری ژمارە شەستوسێ مان بۆ درێژەدان بوو بە هەمان بابەت و بەشی سێیەمی باسەكەمان ڕوونكردەوە كە لێرەدا دەیخەینەوە بەردیدی ئێوەی بەڕێز و، باسمان لە "پەیوەندی و تێكەڵاوی و لەخەڵك‌دانەبڕانی پێغەمبەر كرد – دروود و سڵاوی خوای لەسەر بێت - كە وەك هەفتەكانی تر زۆربەی گوتارەكەمان لەژێر ڕۆشنایی ئایەتەكانی قورئانی پڕ لە بەخششەوە بوو وەك:
یەكەم: سەدوهەشتەمین ئایەتی سوورەتی"یووسف" كە خوای گەورە فەرمان دەكات بە پێغەمبەر – دروود و سڵاوی خوای لەسەربێت – كە بەرچاوڕوونی و بێ پەنامەكێ و نادیاری لە بانگەوازەكەیدا ڕابگەیێنێ و خەڵكەكە لە ڕاستییەكان ئاگاداربكاتەوە، كە ئەمە لە ڕۆژگاری ئیمڕۆماندا وەك نیشانەیەكی پێشكەوتن و شارستانی هەر دەسەڵاتێكە كاتێ بەخۆیاندا دەڵێن و، گوایە زۆر ڕوون و بێشاراوەیی و "شەفاف"ن كە دەبینین خوا گیان پێی دەفەرمێت: "بڵێ ئەمە ڕێباز و ڕێگاكەی منە و بانگەكەی من بۆ خوایە و لەسەر بەرچاو ڕۆشنی بانگەكەم دەكەم * من و شوێنكەوتووەكانیشم، پەنایش دەگرم بەخوا من یەكێك نیم لە هاوەڵ‌بۆخوادانەران". كە بێت هەڵوەستە تەنها بەدیار ئەم خاڵەوە بكەین دەزانین زۆربەی ئەوانەی خۆیان بەودا هەڵدەواسن بەدەر لەخۆ دانە پاڵ لە كردەوەكانیاندا بەدەگمەن بچنەوەسەری.
دووەم: لە ئایەتەكانی 214 – 216ی سوورەتی"شوعەرا"دا دەفەرمێت: "خزمە نزیكەكانت بترسێنە و باڵی نەرمی و خۆبەكەمزانینت ڕابكێشە بۆ ئەوانەی كە بڕوادارن و شوێنكەوتووتن، گەرهاتو سەریان لەفەرمانت پێچا، بڵێ من بەدوورم لێتان و لە كردەوەكانتان". كە جێی خۆیەتی لێرەدا دان بەوڕاستییە تاڵەدا بنێم كە ئێمەی كەسایەتیی بە ئایینەوە ناسراو، یان خۆ هەڵواس بە ئاییینەوە، لە خۆ وەپاڵدان زیاتر بە كەمیی ئایین لە كردەوكانماندا ڕەنگبداتەوە لەكاتێكدا كە خوای گەورە خۆی لە سەدوپێنجەمین ئایەتی سوورەتی"تەوبە"دا پێمان دەفەرمێت:
"پێیان بڵێ: چ كار بكەن لەمەولا خوا كارەكانتان دەبینێ و پێغەمبەرەكەیشی و بڕوادارانیش و لەمەولا دەگەڕێنرێنەوە بۆلای ئەوكەسەی زانا و شارەزایە بەسەر پەنام و نادیار – غەیب- ـەكاندا و بەسەر ئەوشتانەی كە دیاربوون و ئەوەی خنە پنەتان لێدەكرد دەتانشاردەوە پێتانی دەڵێتەوە كە چیتان دەكرد".
ئەمە وام لێدەكات لێردا چەند دێڕێك لە نووسینێكی خۆم بخەمەوە بەردیدی ئێوەی بەڕێز كە لە ژێر سەردێڕی"لە ئایینی ئیسلامدا، سیفەتی(قودوس)یەت، تایبەتمەندیەكی خوای گەورەیە!" بە دوو بەش لە ژمارە 1632 و 1639ی 27ی 11 و 4ی12ی 2004دا لە ڕۆژنامەی خەبات بڵاوم كردەوە:
(ئەوەی ئێمە لە ئیسلام تێگەیشتبووین و لەرێگەی قورئانی پیرۆزەوە لێی شارەزا ببووین، ئەوە بوو كە بەومانای كە بەرجەستە ببێت لەكەسێك، یان گرووپێك یان لە هیچ شتێكدا، وەك چۆن لەسەردەم وكاتێكی دیاریكراویشدا كۆتایی نایەت!
ئەوەی ئێمە لەم ئیسلامە گەیشتبووین، ئەوەیە، كە ئایین بۆئەوە هاتووە، كە كۆمەڵێك بەهای جووانی هێناوە و لە هەركوێیەك ئەو بەهایانە هەبوون ئەوا ئیسلامیش لەوێ‌ هەیە!
لەهەركوێیەكیش ئەوبەهایانە نەبوون ئەوا ئیسلامیش لەوێ‌ نیە!
ئەوەی ئێمە لە ئیسلام گەیشتبووین، ئەوەیە: بەبێ‌ چەند و چوون ئەوە رەفز دەكات، كە ئاڵای شەكاوەی پەیوەست بێت بەناوچاوی هیچ تاك، یان نەوە و نەتەوە و رچەڵەكێكەوە، یان پابەند بێت بەروواڵەتی كۆشكێك، یان شارێك، یان پەیكەرێكەوە.
بۆچوونی ئێمە بۆ ئەم ئایینەوایە، كەپیرۆزی و پارێزراوی لە هەڵەكردن، لە میانەی ئەو سیفەتە گەورانەن، كە تایبەتن هەر بە خوای گەورەوە، وەك لە بیستوسێهەمین ئایەتی سوورەتی"حەشر"دا دەفەرمێت:
" پەروەردگارتان خوای بێ‌هاوەڵە، كە گەورە و پیرۆز– قودوس -ـە، كەوابووهەریەك لەودووسیفەتە – پیرۆزێتی و بێ‌هەڵەیی - بدرێت بە هەرتاكێك لەكۆمەڵدا، ئەوە هاوەڵ پەیداكردنە بۆ خوا و بدرێتە پاڵ هەر شوێنەوارێك، ئەوە بتپەرستیە.

© 2017 Hawler