تشرینی دووەم 20, 2019

شەیما مستەفا

 

پشتی ڕویدانێن سالا ٢٠٠٤ێ ئەوا هاتی ناڤکرن ب سەرهلدانا قامشلو بو ئێکەم جارا ڕوژئاڤا ئانکو کوردستانا سوریا کەفتە د ناڤ لاپەرێن ڕوژنامێن جیهانی دا، ب بورینا سالان و پشتی دەستپێکرنا سەرهلدانین عەرەبی ئەوێن دهێنە ناڤکرن ب بهارا عەرەبی چەندین وەلاتێن عەرەبی ب خونیشاندان و شەرێن ناڤخویی سەرکردێن وەلاتێن وان هاتنە گهوڕین، سەردەمەك خویناوی بوو، ل لیبیا پشتی هێرشێن ئاسمانی یێن نیڤدەولەتی سەروکێ وی وەلاتی ب کوشتی هاتە لادان، دەسەلاتا مسرێ دوو جارا هاتە گهوڕین، هزر دهاتە کرن ل وەلاتێ سوریا ژی دێ پشتی چەند هەیڤەکا رژێم هێتە گهوڕین بەلێ پیشبینی وەسا نە دەرکەفتن، ژ بەر تێکەلی و مایتێکرنا راستەوخو یا وەلاتێن هەڤسنور و زلهێز ئاریشا سوریێ ڕوژ بو ڕوژ مەزنتر لێ هات، ژ بلی هێزێن دەولەتێن دی ل سوریا چەندین گروپ و کومەلێن رادیکال پەیدا بوون، کورد وەك پێکهاتەکێ گرنگ ل سوریا ئەوا دهێتە ناڤکرن ب کومارا سوریا عەرەبی خودان چ ماف نەبوون و ناسناما عەرەبی ل سەر وان هاتبوو پێگری کرن، دەلیڤە بو کوردا پەیدا بوو و پشتی دەرکەفتنا گروپەکا چەکداری یا تیروری و داگیرکرنا چەندین دەڤەران هێزێن کوردی مەزنترین پارێزەر بوون بو لادانا ڤێ گروپێ و شیان دویر بیخن پشتی شەهید بوونا هزارەهان گەنج و سڤیلان، پشتی شیان خوە بدەنە ناسکرن بو ڕایا گشتی یا جیهانێ و شیان تا ڕادەیەکی هێزا خوە دیار بکن، ڤێ جارێ گروپێن دخواستین رژێما سوریایێ لادەن ڕویێ خوە دا هێزێن کوردی و بوون مەترسی ل سەر ڕوژئاڤایێ کوردستانێ، ئێکگرتنا کوردان ل ڤی دەمی شیا گەلەك ئاریشا چارە بکت بەلێ ئەگەر بەردەوامی پێ بهێتە دان و نە بو دەمەکی بتنێ بت. دیسان ل ڤێرێ دپلوماسی فاکتەرەك گرنگە بو وێ جەندێ کو کورد بشێن پشتەڤانیا نیڤدەولەتی ب دەست خوە ڤە بینن و نە بتنێ د دەمێ هەبوونا مەترسیان دا بەلکی د دەمێ ئاشتیێ ژی دا بەردەوامی پشتەڤانی ل خەبات و تێکوشینا وان بهێتە کرن. بەلێ یا ژ هەمیێ گرنگتر ل ڤێرێ ئەوە کورد لگەل ئێك بن و ل دەمێ پەیدابوونا ئێکگرتنەکێ ئێدی هێزێن بیانی نەشێن کاریگەریێ ل سەر چ هەوڵێن کوردان بکن و سەربورێن ڕابردوو یێن نە خواستی و کارەسات ناهێنە دووبارەکرن ئەگەر ئێکگرتن ببت بنەمایێ سەرەکی یێ کوردان. ئێدی کوردستان نە ئاشوپیە و گەلەك لایەنێن دژی ناڤێ کوردان ئەڤروکە خودان بوچوونەك جودانە ژ بەرێ. ئێکگرتنا مەزن ل پارچەیێن کوردستانێ خالا سەرەکی یە بەلێ بو ڕوژئاڤا ب خوە ژی پێتڤییە سەرەکی بت، هەبوونا هزرێن جودا جودا هەلبەت بنەمایەك دیموکراسیێ یە، بەلێ دڤێت ئەڤ جیاوازیا بوچوونان د دەمێ خوە دا بت و ژ بەری دەستکەفتیان ئەڤ چەندە د بەرژوەندیا دوژمنان دایە. و دڤێت لایەنێن روڵێ خوە هەی د سوریایێ دا پێداچونەکا رژد د سیاسەتا خوە دا بکن دا کو ڕوژئاڤا دووبارە نەکەڤت د قەیرانێن نوی دا.

© 2017 Hawler