کانونی یەکەم 11, 2019

لێپێچانەوە لەسەر نیازیش دەكرێت؟

عومەری چنگیانی

بە دەگمەن نەبێ ئێستا سەیری تیڤی ناكەم؛ دراما لای من جێگایەكی وای نیە، بە ڕێكەوت، یان وەك هەندێك پێیان خۆشە بڵێین: "قەزاو قەدەر" لەڕێگای "نێت"ـەوە ڕێم لە زنجیرەیەكی بەرنامە نیسریەکەی "ج سؤال" کەوت، كە "أشرف عبدالباقي" پێشكەشی دەکا؛ میوانی ئەم جارەی "محیی اسماعیل" بوو، كابرایەكی كەمێك ناسراو، لە میانەی وتەكانیدا باسی ڕۆمانی سەرلێشێواو، یان تێكچوو، یان خۆ لێگۆڕاو، "المخبول"ی كرد كە لە نووسینی خۆیەتی و دواتر كراوە بە فیلم. ئەوەی جێگای سەرنج بوو لەلام نموونەی بەوە هێنایەوە كە بە كابرایەكی پۆلیس بڵێی ئەفسەری سەربازی و ئەویش خۆیی لێ بگۆڕێت و لەسەر ئەو بنەمایە ڕەفتار بكات، پاشان گوتی ئەم زەویە، ڕەنگە سێ‌ملیار مەخبولی لێ بژیێت و خۆیان لێ گۆڕاوە و، هەریەكەیان سنووری زانستیان دیاریكراوە! جا لەگەڵ ڕستەی كۆتایی قسەكانیدا بیستوحەوتەمین ئایەتی سوورەتی "نەجم"ـم هاتەوە یاد هەتا ئایەتی سیهەمینی ئەو سوورەتە، كە خوا لەو چەند ئایەتەدا باسی توێژێكی كۆمەڵگا دەکا و دەفەرمێت: "بەڕاستی ئەوانەی بڕوا بە ڕۆژی دوایی ناهێنن و لە بێزانستی و بێئاگاییانەوە ناوی کچانە لە فریشتەكان دەنێن و بە نێر و مێیا دەزانن * لە كاتێكدا لەسەر ئەوكارانەیان هیچ زانستێكیان نیە و هەر بە مەزەندە و بە گومان ئەوەیان کردووە، كە بەڕاستی هیچ كات گومان ناتوانێ مرۆڤ لە هیچ ڕاستییەك بێنیاز بكات * دەی گوێ مەدە بەوانەی كە بڕیاری پشتكردنە یادی ئێمەیان داوە و تاكە ئارمانج لای ئەوان ئەم كورتە ژیانە بەرچاوە لەخۆیان نزیكە – دنیا – یە * ئەوە سنووری خواست و زانستی ئەوانە، یاخود هەموو ئارمانجی ئەوان لە زانست هەر ئەوەندەیە . بەڕاستی پەروەرینی تۆ لەهەمووان باشتر دەزانێ كێ لە دۆزینەوەی ڕێگای خوادا خۆی بزركردووە و هەر ئەویشە دەزانێ كێ ڕێنمایی كراوە و ڕێگای ڕاستی گرتووە".
خوێنەری خۆشەویست! هەر ئەو چەند وشەیەی ئاخر ئایەت، كە باس لە سنووری هەوڵو زانستی كەسانێك دەكات، بەسە بۆ ئەوەی مرۆڤ تێبگات كە ئێمە لەم وڵاتەی خۆمان چۆن گیرمان خواردووە بەدەست "مەخبول"ـەكان و ئەوانەوە وا ئارمانجی بچووك لای ئەوان لە پێش هەموو شتێکەوەیە و كاری گەورەیان پێ سپێردراوە، ئەوە وام لێ دەكاتەوە دیسان بچمەوە نێو خەرمانی نووسینەكانم و ئەمجارەیان بۆ لاپەڕە 8ـی ژمارە 1377 ی ڕۆژنامەی خەبات، لە 4ی ئاداری 2004دا، واتە بەر لە چواردەساڵ و دوو ڕۆژ، كە لە ژێر سەردێڕی"تۆ بڵێی هەندێ لە كارمەندە بەڕێزەكانی دەزگا حكوومییەكانی كوردستان، بە هەڵە لە شوێنی كارەكانیان نەگەیشتبن؟" وتوومە:
"باشە ئێوەیش ئاگاتان لەوە نیە كە هەندێ‌ بەرپرس و كارمەندی، نێوحكوومەت و ئیدارەی كوردیمان لە بەرامبەر هاووڵاتیان، چەند بێ بەزەیین؟
باشە هەموومان ئەو راستیە نازانین، كە جیاوازیەكی زۆر هەیە، لە نێوان ماڵی هەرتاكێك و شوێنی وەزیفەكەیدا؟
با ڕوونتربیڵێم: جیاوازیەكی زۆر گەورە و گران هەیە، لە نێوان كار و كەسایەتی هەرتاكێكدا، لەگەڵ شوێنی كاری وەك نمایندەیەكی گەل؟
برایینە: دەكرێ‌ هەر تاكێك هەڵگری هەربیر و باوەڕێك بێت كە خۆی لەلای پەسندە و لە ماڵەكەی و ئەتواری ناوكۆمەڵدا رەنگ بداتەوە، بەڵام ئەوكاتەی كە دەچێتە سەركورسیەك و كارێكی جەماوەری لە ئیدارەیەكی كوردیدا پێ‌ دەسپێردرێ، دەبێ‌ وەك كەسایەتیەكی كوردی كوردستانی مرۆڤ دۆست و بەس، ڕەفتار بكات و بزانێت وەختێ‌ هاوڵاتیەك دەچێتە بەردەمی، نە بۆ بارەگای حیزبی و نە بۆ دوكانەكەی و نە بۆ دیوەخان یان مزگەوت یان كڵێسا یان تەكیە و خانەقاكەی ئەو نەچووە، كە زۆر بەداخەوە رێژەیەكی بەرفرە لە كۆمەڵگای ئێمەدا، لە دەست ئەو واقیعە تاڵە دەناڵێنن!
كە مەلامستەفا بارزانی، سەرجەلەی كاروانی خەباتی كوردایەتی بوو، لەگەڵ ئەوەی كە ئیماندار و قورئانخوێن بوو، سەدان پێشمەرگەی ماندوویەتینەناسی ئاشووری و ئێزدی پێشمەرگەی ئەو شۆرشە مەزنە بوون، لام وانیە كەسێك هەبێت كە تاكە هەڵوێستێكی ئەو سەركردەیەی لەبیربێت، كە هەستابێت بە برینداركردنی هەستی هیچ كەسێكیان، بە پاساوی ئەوەی، كە لە ڕووی دید و بۆچوونی مەزهەبیانەوە لێك جودا بووبێتن!
تەنانەت كە چەند مەلایەكی عەرەبی نێردراوی حكوومەتی عێراق لەسەرەتای حەفتاكانی سەدەی رابردوودا، هاتن بۆ تەقاندنەوەی ئەو، خوای گەورەیش كردنیە قەزاوەگێڕی سەرۆك، بەڕێزیان دڵی مەلایەكی نەڕووشاند، بگرە مەلای وا هەبوو شایانی ئەوە بوو كە بە سزای عادیلانەی شۆڕش بگەن، سەرۆك بارزانی چاوی لێدەپۆشین.
دەگەڕێمەوە سەرباسەكەی خۆم و دەڵێم: زۆر زۆر بەداخەوە گەلێ‌ جار، ئەتواری هەندێ‌ لەكاربەدەستانمان دەبێتە هۆكاری ئەوەی كە بپرسین "ئایا دەزگا حكوومیەكانی كوردستان، دەزگای تایبەتین، یان بۆخزمەتی هاوڵاتی دامەزراون؟" دەڵێم داخوا ئەو كارمەندە بەڕێزانە، نازانن ماڵ و مەرزێنگە (دائیرە) جیاوازییان چیە، یان هەندێكیان ئەتواری كۆن و سەردەمی حوكمڕانی بەعس و شێوازی رەفتاری ئەوكاتیان تێداماوە، یان خوانەخواستە، شوێنەكە شوێنی ئەوان نیە؟!

© 2017 Hawler