کانونی یەکەم 08, 2019

مستەفا خۆشناو

٣9 ساڵ تێپەڕ دەبێت بەسەر كۆچ باربوونی سەرداری مەزنی كوردستان مەڕحوم مەلامستەفا بارزانیدا کەلە 1/3/1979 بە هۆی نەخۆشیەكی سەخت و كوشندە لە نەخۆشخانەی"جۆرج تاون" کەیەكێكە لە نەخۆشخانەكانی وڵاتە یەكگرتوەكانی ئەمریكا، بۆ دواجار چاوە گەشەكانی لێكدەنێت و ماڵئاوایی یەك جارەكی لەگەل و نیشتیمانەكەی دەكات.
كاتێكیش ئەم هەواڵە بۆ یەكەمین جار لە میدیاكانی ئەمریكادا ڕاگەێندرا ماتەم سەرتاپای كوردستانی گەورەی گرتەوە بەهەر لایەكدا دەتكردەوە تازیەباری بوو كەس نەیدەزانی سەرەخۆشی لەكێ بكات، چونكە بارزانی موڵكی ماڵبات و خانەوادەیەک یاخود سەرۆکی حیزبێك نەبوو، بەڵكو ئەو ڕێبەرێكی هەڵکەوتوو ڕاستەقینەی کوردستان بوو، غەمی گەورەی ئەو خەمی خاک و نەتەوەكەی بوو، لە هەمان كاتدا تا ئەو ڕۆژەی تەرمی بارزانی گەیشتەوە خاکی پیرۆزی کوردستان و بەخاک سپاردنی لە سەر وەسیەتی خۆی لە نزیک ئارامگای شێخ بابۆی برای لەشاری شنۆی ڕۆژهەڵاتی کوردستان، لە ناو ئاپۆڕای ماتەم گێڕاندا کە مەزەندە بە 300 هەزار کەس دەکرا کە لە مەراسیمی پێشوازی و‌ بەخاک سپاردن، لە تەرمی بارزانی سەردار و جەنەڕاڵی مەزن لە هەر چوار پارچەی کوردستان لە ڕێکەوتی 5/3/1979 ئامادەبوون، زۆرێك لە نیشتیمان پەروەر و ئازادیخوازانی كوردستان باوەڕیان بە ڕاستی هەواڵی كۆچ باربوونی بارزانی نەدەكرد.
بارزانی مرۆڤێك بوو، بەڵام ئەو غەم و ئازار و مەینەتیەكانی میللەتێكی مەزڵوم و ژێر دەستی لە كۆڵدا بوو، هەمیشە بۆ نەتەوەكەی دەژیا خۆشەویستییەكی لە ڕادە بەدەری بۆ نیشتیمانەكەی هەبوو هەروەك دەی فەرموو(ئەگەر خۆشەویستی نیشتیمان تاوان بێت ئەوا من تاوانبارترین كەسم)
ئەو خۆشەویستییەی بارزانی بۆ نیشتیمانەكەی لە وەوە سەر چاوەی گرتبوو كە لە خانەوادەیەكی قاڵ بووی ناو شۆرش و ڕاپەڕینەكانی كوردستان و ناوچەكە چاوی گەشی بە دونیا هەڵهێنابوو، هەردەم دژ بەو ستەم و زووڵمە زۆرەی كە لە نەتەوەكەمان دەكرا بە درێژایی مێژوو بەرگریكارێكی سەر سەخت و بێوێنە بوون .
هەر ئەمەش وای كردبوو بارزانی لەمنداڵیەوە ئاوێتەی ناو خەبات و تێكۆشانێكی دژوار و ڕاستەقینە بێت و ببێتە پاسەوانێك و بەرگریكارێكی مەزن و دڵسۆز بۆ پارێزگاریكردن لە شوناس و ناسنامەی نەتەوەیمان،ئەوەتانێ
جلیل گادانی، سیاسەت مەداری ڕۆژهەڵاتی کوردستان لە كۆنگرەی ٩٠ ساڵەی لە دایك بوونی بارزانیدا کە لە ڕۆژانی 1٤ تا 17 /9 /1993 بۆ ڕێزگرتن لە 90 ساڵەی لەدایک بونی بارزانی لە ژێرچاودێری سەرۆک مسعود بارزانی و ئامادەبونی ژمارەیەکی زۆر لە کەسایەتی و سیاسەتمەداران و ئەدیب و شاعیرانی کورد و عێراقی لە هاوینە هەواری پیرمام گرێدرا، کە تێیدا چەندین لێکۆڵینەوە و شیعر و وتاری بەپێز لە لایەن ئامادەبوانەوە پێشکەشکران، گادانی لە وتەیەکدا دەرحەق بە بارزانی دەڵێت: مستەفا بارزانی بەو ئیمانە پۆڵاینە كە هەیبوو دەبوو زۆر لەوە زیاتر بژی، بەڵام پەژارە و مەراقی فاشی لەو خیانەتە كە لەو مەرحەلەیەدا لێی كرا بەداخەوە مردنی مستەفا بارزانی وەپێش خست .
بەڵام، مستەفا بارزانی و ڕێبەرانی ڕاستەقینەی هیچ گەلێكی چەوساوە نامرن. گادانی زیاتر توڵی دەداتێ و دەربارەی ڕۆژی بەخاك سپاردنیشی دەڵێت چ مەحشەریك لە شاری شنۆیە لە كاتی ناشتنی مستەفا بارزانیدا ڕوویدا، بە خاك سپاردنی مستەفای بارزان لە شاری شنۆ ڕاپەڕینێكی دیكەی گەلی كورد بوو لە باری بیرو و باوەڕەوە بە تێكڕاوە بە تایبەتی هاوسەنگەرانی مستەفا بارزانی بوو هاو بیر و باوەڕان و بنەماڵەو دلسۆزانی كورد و پارتی دیموكراتی جارێكی دیكە موتەئەهیدكرد كە دەبێ بە هەموو توانایانەوە لە سەر درێژەدانی ڕێگای هەمیشە ڕوونی بارزانی سوربن وە ئێستاش ئاكامەكەی دەبینین .
سەرۆك مسعود بارزانیش لە كتێبەكەی خۆیدا بەناوی بارزانی و بزوتنەوەی ڕزگاریخوازی كورد لە لاپەڕە ( ٢٦٧ ) دەفەرموێت: کۆچی دوایی بارزانی هەرگیز نابێ بەكۆسپ لە ڕێگەی درێژە پێدانی ئەو خەباتەی كە ئەو ئەركەكەی لە ئەستۆ گرتبوو، خەبات هەر بەردەوام دەبێ و ڕەوت هەر لەسەر ڕێبازەكەی ئەو دەبێ لە ڕاستیشدا هەر ئەمەیە خواست و ئارەزوی بارزانی. باشترین بەڵگەی وەفاداریش بۆ یاد و بیرەوەری ئەو، ئەوەیە ئەو مەشخەڵەی خەباتەی ئەو هەڵی گیرساند هەر بە هەڵگیرساوی بمێنێتەوە" .
لە دوایی ڕاپەڕینە مێژوویەکەی بەهاری 1991 ئازادبوونی بەشێکی باشوری کوردستان و هەڵبژاردنی پەرلەمانی ساڵی 1992 و دامەزراندنی یەکەمین کابینەی حکومەتی هەرێمی کوردستان، لە 6/10/1993 تەرمی نەمران بارزانی ڕابەر لەتەک تەرمی کاک ئیدریس بارزانی لە نێو ئاپۆڕەی سەدان هەزار کەس لە خەلکی بە ئەمەکی کوردستان گەیشتەوە باشوری کوردستان و لە ڕێوڕەسمێکی شایستەو نەتەوەیدا لە 8/3/1993 دامێنی چیای سەرکەشی شیرین لەگوندی بارزانی زێد و لانەی خەبات و بەرخودان ئەسپەرد بە خاکی دایک کران.
جێگای ئاماژەپێدانە ساڵانە بەسەدان هەزار کەس لە کوردانی باشور و پارچەکانی تری کوردستان و تاڕاوگە، لە مورید و عاشقانی بارزانی، زیارەتی مەزاری نەمران دەکەن و دوای خوێندنی سورەتی الفاتیحە، پەیمانی ئەوە نوێ دەکەنەوە کە هەمیشە پەیرەوی ئەوڕێ و ڕێبازەبن کە بارزان بەدیهێنەرەکەیەتی و وەفاداربن بۆ دلسۆزو هەڵگرانی پەیامی ڕاستەقینەی کوردایەتی، کە پارتی دیموکراتی کوردستان بە ڕێبەرایەتی سەرۆک مسعود بارزانی بە شانازیەوە سەرکێش و هەڵگری ئەم پەیامە ڕاستەقینەیە کە مستەفا بارزانی هەموو تەمەنی خۆی لە پێناویدا بەخشی .
لە هەمانکاتدا نوێنەران و دیبلۆماتکارو کەسایەتیە بیانیەکانیش لەو ڕۆژانەدا ڕوو دەکەنە بارزان و دوای دانانی چەپەکە گوڵی ڕێز لە سەر مەزاری بارزانی باوک و کوڕ، سەریش لە بەرامبەر خەبات و ماندوو بونی بێ وێنەیاندا دادەنوێنن .

هەزاران سلاو لە ڕۆحی پاکی بەرزەفری باوکی ڕۆحی نەتەوەی کورد مەلامستەفا بارزانی و کاک ئیدرسیی هەردەم لەیاد .

© 2017 Hawler