کانونی یەکەم 11, 2019

ئاریان فەرەج

كێشەی دەسەڵاتداری عەرەب لەگەڵ كورد نە لەسەر ریفراندۆمە و نە لەسەر نەوت و سنور و ماددەی سەت و چل. كێشەكە لە سەر ناشكوری كوردە.
ئاخر ئەوان ( نەعوزوبیللا) وەك خۆیان بە خوا بزانن و ئێمەش بە عەبدو رەعیەت، پێیان وایە ئەو ماف و بەركەوتانەی پێیان بەخشیوین!!، زۆرە و بەڵام ئێمە ناشكور و چاوبرسین و بە بەشی خوا رازی نین. هەر بۆیەش بە كافر و خوانەناسمان دەزانن. ئەوان پێیان وایە ئیرادەی خودایە كە ئێمە بندەستی ئەوان بین و رازی نەبونمان بەو واقیعە، ناشكوری و رازینەبوونە بە بەشی خودا.
دەمی هەر دەسەڵاتدارێكی ئێستای بەغدا بكەیتەوە بە هەمان لۆژیكی ئەوانەی رژێمەكانی پێشوو دەڵێن: كورد لە عێراقدا زۆرترین مافی دراوەتێ و لەچاو مەزڵومیی كوردانی وڵاتانی دیكە، مەلیكن و لە هیچیان كەم نییە. بەڵام هێشتاش هەر پێ درێژ دەكەن و هەڵپەی زیاتریانە و واز لە خەونی تەماعكارانەی سەربەخۆیی ناهێنن.
ئەم عەقڵیەتە سەبەبكاری راستەقینەی مەینەتییەكانی كوردە بەدەست بەغدای عەرەبییەوە، جا ئیتر ئەو بەغدایە بەدەست هەر جۆرە عەرەبێكەوە بێت فەرق ناكات. ئەوان باوەڕیان وایە كورد بە بندەستی خەلق بوون و دەبێ هەر ماف و بەركەوتێكیان هەبێ لەبن سەقفی بندەستیدا بێت و لەوە زیاتر هەڵنەكشێ. هەر پێراكێشانێكیش بەرەو سەربەخۆییان ببات، یاخی بوونە لە قەدەر و ئیرادەی خودا و دەبێ رێگەی لێبگیرێ و بە سزادان و زەبر و زەنگ بهێنرێنەوە نێو (بەیتول تاعە) و گوێرایەڵی.
ئەمانە نە ئەوەندە لەگەڵ دین و ئیمانی خۆیان راستگۆن باوەڕیان هەبێ كە خودا مرۆڤەكان و میللەتەكانی بە ئازادی خەلق كردووە و نابێ كەس ژیردەستەی كەسێكی دیكە و میلەتێك ژیردەستەی میلەتێكی دیكە بێت و دەبێ هەمومان تەنیا عەبد و ژێردەستەی خودا بین، نە ئەوەندەش ویژدانیان هەیە و عەقڵیان بەكارە بۆ جارێك لە خۆیان بپرسن ئەوان بۆ سەربەخۆ و خاوەن دەوڵەتن و بە بندەستی رازی نین و كەچی میللەتی كورد كە كولتور و فەرهەنگی لەوان پێشكەوتوترە، دەبێ پاشكۆ و بێ دەوڵەت و بندەست بێت.
ئەگەر بۆ جارێك ویژدان و عەقڵ و ئەخلاقی سیاسییان رێگەیان بدات باوەڕ بەو راستییە سادەیە بێنن كە سەربەخۆیی و ئازادی وەك چۆن بۆ ئەوان و میلەتانی دیكە رەوایە، بۆ كوردیش رەوایە، ئەوكات تێدەگەن ئەگەر كورد لە بندەستیدا زۆرترین مافیشی هەبێت، مادام مافی سەربەخۆیی لێ زەوت كراوە، هەر كەمە و كەمترە لەو مافەی خودا پێی رەوا بینیوە.
ئەگەر ئەمانە عەقڵیان كاربكات و بتوانن مێژوو بخوێننەوە و لە رابردوو وورد ببنەوە، دەزانن كورد یەك تاكە ماف و دەسكەوتی وەك بەخشش و خێرپێكردن وەرنەگرتووە و هەمووی بە شەڕ و بە زەبری شەق و بە قوربانیدان لێ ستاندوون و هەر بۆیەش هەركات خۆیان بەهێز ببینن دەیانەوێ لێمان بستێننەوە.
ئێستا بە خەیاڵی خۆیان ئەو دەرو زەمانەیە كە خۆیانی تێدا بەهێز و ئێمەی تێدا لاواز دەبینن، دەیانەوێ هەرچیمان بەدەستهێناوە لێمان بستێننەوە، ئەمە ئەسڵی كێشەكەیە و ریفراندۆم و غەیری ریفراندۆم هەمووی بڕو بیانوو و بەهانەن.

© 2017 Hawler