تشرینی دووەم 20, 2019

سەرچاوەی كیشەكان ریفراندۆم نەبوو

ئاریان فەرەج

بە هیچ چەواشەكاری و درۆ و دەلەسەیەك ئەو راستییە ناشاردرێتەوە و ئاوەژوو ناكرێتەوە كە سەرچاوەی كێشەكان و مەینەتییەكانی ئێستای كوردستان بۆ ریفراندۆم ناگەڕێتەوە بەڵكو هەڵسوكەوت و هەڵوێستە خراپەكانی چەند ساڵی ڕابردووی حكوومەتی بەغدا بووە هۆكار. ڕیفراندۆم بەرەنجامی شكاندنی دەستوور و تەوافوق و شەراكەت و هاوسەنگیی بوو، بەرەنجامی هەڵگەڕانەوەی دەسەڵاتدارانی بەغدا بوو لە كۆی ئەو پرنسیپانەی بڕیار بوو عێراقی نوێی لەسەردامەزرێت. پیلانی بێهێزكردن و دژایەتی هەرێم پێش ریفراندۆم و تەنانەت پێش شەڕی داعشیش دەستپێكرابوو، هەر درێژەپێدانی هەمان دژایەتی و دوژمنكاری رژێمەكانی پێشوو بوو، دەنا :
- كاتێك مالیكی دەبابەكانی ناردە قەرەتەپە و جەبارە و بە قواتی دیجلە و گەیشتنی ئیف شازدەكان هەڕەشەی لە كوردستان دەكرد، كاتێك بودجەی خەڵكی كوردستانی بڕی، خۆ ڕیفراندۆم لە ئارادا نەبوو. .
- كاتێك كە ڕژێمی بەعس ئەنفال و كیمیابارانی گەلی كوردستانی دەكرد، خۆ ڕیفراندۆم نەكرابوو.
- كاتێك كە دەیان ماددەی دەستوری تایبەت بە مافەكانی خەڵكی كوردستان پێشێل كران و ماددەی 140 جێبەجێ نەكرا و ئیعلانیان كرد كە ماددەیەكی بەسەرچووە و چیتر پابەندی جێبەجێكردنی نین، خۆ ڕیفراندۆم ئەنجام نەدرابوو.
- كاتێك كە ڕێككەوتنەكانی ئۆپراسیۆنی ئازادكردنی موسڵ پشتگوێ خران و پێشێل كران، خۆ ڕیفراندۆم ئەنجام نەدرابوو.
ریفراندۆم هۆكاری مەینەتی خەڵكی كوردستان نەبوو، بەڵكو دەریچەی رزگاربوون بوو لەو مەینەتیی و بێ ئایندەیی و پلانە گڵاوانەی بۆ كوردستانیان داڕشتبوو، ریفراندۆم نەشكرابا، نیەتی بەغدا دەمێك بوو پەلاماردانی كوردستان و داگیركردنەوەی بوو. تاكە خاڵی لاوازی كوردستان، خاكفرۆشی و خیانەتەكەی تاقمی 16ـی ئۆكتۆبەر بوو، كە كوردستانی خستە هەڵوێست و پێگەیەكی لاوازەوە و ناحەز و دوژمنی پێ خۆش كردین، ئەگەر ئەم خائینانە دەستیان تێكەڵ نەكردبا و ڕێككەوتنیان نەكردبا، هێزی عێراقی جورئەتی ئەوەی نەدەكرد كەركووك داگیر بكات. ئەگەر ئەو خیانەتە نەكرابا، ئەوە ئێستا دانوساندن لەسەر سنوور و كاتی ڕاگەیاندنی سەربەخۆیی دەكرا نەك عەبادی گاڵتە بە هەست و سۆز و دەستكەوتەكانی گەلی كوردستان بكات و بۆ موچە دەستی دەستی بە میللەتەكەمان بكات.
كاتێك عەببادی دەڵێت كوردستانی عێراق لە ساڵی نەوەت و یەكەوە دابڕاوە و دەبێ دەمجی عێراق بكرێتەوە، كەواتە ئەم دەسەڵاتە ملهوڕەی بەغدا لەسەر راپەڕین سزای خەڵكی كوردستان دەدات، نەك لەسەر ریفرانۆدم. ئەم گاڵتەجاڕی و سزادانە دەبێ سنورێكی بۆ دابنرێ.

© 2017 Hawler