تەمموز 21, 2019

هێندەی بتوانم من مەبەستم چاكسازییە!

عومەری چنگیانی

 

ئەمڕۆ كە نۆمینەی مانگی تەمووزی 2019ی زایینییە، پێم خۆشە لەم سەروبەندی پێكهێنانەی كابینەی نۆی حكوومەتی هەرێمی كوردستانەدا نووسینێكی خۆم بێنمەوە بەر دیدی هەموولایەك، كە چواردە ساڵ و دوو ڕۆژ لەمەوبەریش لەژێر سەردێڕی" گەورەكان چۆن بەرپرس هەڵدەبژێرن؟" لە لاپەڕە سیانزەی ژمارە 1847ی ڕۆژنامەی "خەبات"دا بڵاوم كردووەتەوە و هەر لەسەرەتایشدا هەمان ئەو قسەیە دەكەمەوە كە شوعەیب پێغەمبەر- سڵاوی خوای لەسەربێت – بە نەتەوەكەی خۆیانی گوتووە و خوای گەورە لە هەشتاوهەشتهەمین ئایەتی سوورەتی"هود"دا باسی دەكا و دەفەرمێت: كە شوعەیب پێی وتن: " هێندەی بتوانم من مەبەستم چاكسازییە و بۆ ئەم كارە پیرۆزەیشم پشتیوانم هەر خوایە و پشت بەو دەبەستم و بۆلای خۆیشی دەگەڕێمەوە"؛ جا ئەوكات گوتوومە:
خوێنەری بەڕێز!لە بەرای هەموو شت، ئەوەتان پێدەڵێمكە ئەم بابەتەم وەرگێڕانە و،ئەگەر تووڕەییەک هەیە، هیوادارم هەر سەروپۆتەڵاكی نووسەرەكە بگرێتەوە، نەك منی فەقیر، كە ملم لە موو باریكترە.
"گەورەترین تاقیكرنەوەم هەیە لەگەڵ هەرە چڵەپۆپەی دەستەڵاتی وڵاتەكەمدا؛ زۆر لە (سادات) نزیك بوومەوە، هەموورۆژێك چەند جار داوام دەكرد و لەڕێگەی تەلەفوونەوە قسەمان پێكەوە دەكرد. هەفتەی سێ چوار جار دەیمبینی، زۆرجار چاشت و فراڤین و شیوم ـ نانی بەیانی و نیوەڕۆ و ئێوارە ـ لەلاخواردووە. شتی وام لێ بینیوە كە هیچ چاوێك نەیبینیوە و شتی وام لێبیستووە، كەس نەیبیستووە، لە كاتی ئاسایی و نەرمی و تووڕەیی و گاڵتەپێكردنیدا، گوێم لە دەركردنی بڕیارەكانی بووە، هەرگیز بڕیارەكانی سەریان سوڕنەهێناوم، بەڵام زۆر بە هاندەری بڕیارەكان سەرسام دەبووم كە چی و كێ بوون لەودیو دەركردنی بڕیارەكانەوە؟ كۆمەڵێك پیاوم بینی كە بەدەوری سەرۆك ساداتەوە بوون دەیانگوت: فڵانكەس زۆرباشە، بەڵام بەداخەوە جاروبار لە دایكی خۆی دەدات! ئەویش گەرم دەبوو دەیگوت: ئەی پەنا بەخوا لە دایكی خۆی دەدا؟دەك نەفرینی خوای لێبێت!بەڵام كەس بە دووی ئەوەدا نەدەچوو داخۆ کابرا لەدایكی خۆی داوە یان دایكیەتی لەو دەدا؟!
گوێم لە هی وەها بووە كە گوتوویەتی: پەنا بەخوا فڵان كەس ژنێكی هەیە ـ ئێمە نەمانگوتبێت ـ زۆر بەدڕەوشتە و دوو رۆژ لەمەوبەر گوێم لە یەكێك لە منداڵەكانی بووو، لەگەڵ لاوێك، لە مەسەلەیەكی سیاسی و باسی دەستەڵات قسەی دەكرد، كە دیارە ئەوە ڕای خۆی نەبوو! ڕای باوكیەتی! كە مانای ئەوەیە، ئەو لاوە، بەرامبەر حكوومەت و حاكم، وەك تووتی قسە و ڕای باوكی دەڵێتەوە، كە ئەوە ڕایەكی زۆر خراپ و ناپەسەندە!كەوابوو باوكی پیاوێكی بەدە و ناپەسەند! دەرەنجام ئەوپیاوە لەوشوێنەی خۆیدا، پیاوی كارا بۆشوێنی كارنییە. گوێم لێ بوو لەبەردەمی سەرۆك ساداتدا، دەیانگوت: فڵان كەس دزە! ڕاستە براكەی لە ئەمریكا خوێندوویەتی، بەڵام!..... واتە: براكەشی دزە چونكە نابێ خۆی دزبێ براكەی دزنەبێت!ئەی گەورەم نابینی قورئان دەفەرمێت (ئەگەر ئەم دزیبێتی ئەوە براكەشی هەردزبوو) نەیاندەگوت: قوربان ئەوە باسی ئەقڵیەتێكی پڕ لەستەم دەكات، كە براكانی یوسف ئەوهایان دەگوت بە براكەیان، نەك قورئان دان بەوبۆچوونەلارەدا بنێت! هەربەوەندەش تەواو نەدەبوو، بەڵكو دەیانگوت: قوربان مادام خەڵك وا دەڵێن، دیارە دەبێ وا بێت، واتە: كە یەكەم دزبوو، دووەمیش دزدەبێ!كەوابوو گەورەی وڵات كاتێك بۆ پێسپاردنی هەركارێك، خەڵكێك هەڵدەبژێرێت دەچێت پەنا دەبات بۆ: ئەوانەی بەدەوریەوەن و بۆخۆیی هەڵبژاردوون و دەیانكاتە راوێژپێكراوی خۆی و پەناش دەبات بۆ دەزگا هەواڵگرییەكانی خۆی و لەوان دەپرسێ. لە ئەنجامی وەڵامەكانی ئەواندا بڕیاردەردەكات، ئیتر بە پلەی یەكەم ئیعتیماد دەكاتە سەرئەوانەی لە دەوروبەرین و لە روانگەی ئەوانەوە خەڵك دەبینی و تیشكی ئەوان ڕۆشنكەرەوەی بەردەمی جەنابیانە!ئەوان كێیان پەسەند كرد، ئیتر بڕیار بۆئەودەردەچێت! ئەوهایە..!
نوكتەیەكی ئەڵمانی دەڵێ: كابرایەكی سەرخۆش، وەك بڵێی بەشوێن شتێكدا بگەڕێت بەدەوری خۆیدا دەسووڕێتەوە، پۆلیسێك لێی نزیك دەبێتەوە و دەڵێ: لە چ دەگەڕێیت؟دەڵێ: كلیلی ماڵەوەم ونكردووە؛ پولیسەكە دەڵێ: باشە لێرا لێت كەوتووە؟ كابرا دەڵێ: نەخێر، لەو سەرشەقامەكەدا! پولیسەكە دەڵێ: ئەی بۆلێرا بۆیدەگەڕێیت؟ كابرا دەڵێ: ئاخر تیشكی رۆشناییەكە لێرەدایە و لێرە دەدا!
زۆر جاران گەورەی وڵات، بەشوێن ئەوكەسەدا دەگەڕێت كە مەبەستیەتی، نەك لەو شوێنەی شایانی لێ بێ!لە كوێ تیشكەكەی لێیە و لە نێو ئەوانەی بەدەوروبەریەوەن و بەپێوەری ئەوان!جاری وا ڕێک دەكەوێت كە هەق بپێكێ بەڵام بەزۆری هەرنایپێكێ؛ ئەی چارە؟
گەورەی وڵاتیش مرۆڤە، ماندوودەبێت، ئەئێشێت، مەرج نیە هەمووكات هەربتوانێ بڕیاربدات، دەبێ بخوێنێتەوە، تا بزانێ ئامرازەكانی دەستنیشانكردن چین؟ (*)
* بنواڕە نووسینەکەی ئەنیس مەنسووردا لە رۆژنامەی (الشرق الاوسگ)،3/7/2005.

© 2017 Hawler