ئەیلول 18, 2020

دبیت هەر خێزانەك دوو حاویێن گلێشی ل مالا خۆ بدانیت

ل دهۆك و سێمێلێ، بزاڤ بۆ ژئێك جۆداكرنا گلێشێ تەر و هشك ل مالان دا دهێتە كرن

رێڤەبەرییا گشتی یا باژێرڤانییان ل پارێزگەها دهۆكێ ب هەڤكاری و پشتەڤانییا رێكخراوا (ڤی ئێن جی- VNG) یا هولەندی ڤەكولینەك ل دور ژئێك جوداكرنا گلێشێ تەر و هشك ل سنوورێ قەزا سێمل و دهۆكێ دەسپێكرییە، ب شێوەیەكێ گلێش وەك قوناغەكا دەسپێكی هەر ل ناڤا مالان دا بهێتە ژئێك جوداكرن، بۆ هندێ كارێ كارگەهێ ئاسان تر لێ بهێت ژلایەكێ و پتر مفا ژگلێشی بهێتە وەلگرتن ژلایەكێ دی.

ل گورەی پرۆگرامێ مەسار ژبۆ پشتەڤانییا حكومەتێن ناڤخویی بۆ جارا ئێكێ یە چالاكی و ڤەكولینێن ب ڤی رەنگی ل دور ژئێك جوداكرنا گلێشێ تەر و هشك ل ناڤ ماڵان دا دهێنە دروستكرن، چونكە ل دویف دیاركرنا رێڤەبەرێ كارگەها كواشێ یا ژئێك جوداكرنا گلێشی ل قەزا سێمێلێ سەر ب پارێزگەها دهۆكێ ڤە، ژئێك جوداكرنا گلێشی ل كارگەهێ گەلەك ب زەحمەتە و كارتێكرن ل شیانێن كارگەهێ كرییە، و ئەگەر ئەڤ كارە هەر ل ناڤا مالان دا بهێتە دەسپێكرن دێ كار گەلەك ئاسان تر لێ هێت.
حازم عەبدی، رێڤەبەرێ كارگەها كاشێ یا ژئێك جوداكرنا گلێشی ل قەزا سێمێلێ: دەمێ گلێش پێكڤە دهێتە كومكرن ژلایێ خێزانان ڤە گلێشی تەر و هشك تێكەل دبیت و شیانێن كارگەهێ گەلەك كێمتر لێ دهێن و دبیت بگەهیتە 30%، لێ ل دویف خواندن و ڤەكولینان ئەگەر گلێش بهێتە ژئێك جوداكرن وەكو وەلاتێن ئەوروپی دبیت شیانێن كارگەهێ بگەهنە 90%، و ئەڤ رێژە گەلەكە، ژلایەكێ دی ژی ئەگەر ئەڤ پروسە هاتە جێبەجێكرن گلێش دێ پاقژتر لی هێت و دێ ب بهایەكێ بلندتر دێ هێتە فروتن.
پشتی ئەنجامێن ڤەكولینێ ب سەركەفتییانە دەردكەڤن، هەول دێ هێتە دان ل ناڤا مالان دا ب رێیا دوو حاوییان(سەلكێن گلێشی) گلێش بهێتە ژئێك جوداكرن، ئانكو بزاڤ بهێتە كرن هەر خێزانەك دوو حاویێن گلێشی ل مالێن خۆ بدانن حاوییەك بۆ كەرستێن تەر وەك خوارن و ڤەخوارنان و حاوییەك ژی بۆ كەرستێن هشك وەك شیشە و كارتون و ئاسن و هتد، چونكە ئامیرێن ل كارگەهێ كار دكەن ئەو شییانێن مەزن یێن ژئێك جوداكرنا گلێشی نینن و دڤێت ل ناڤا مالان دا بهێتە جوداكرن داكو بارگرانی ل سەر كارگەها گلێشی كێم ببیت، هەروەسا زێدەتر مفا دێ ژگلێشی هێتە وەلگرتن و ئەو كەرستێن دهێنە دەرخستن پشتی ڤاڤارتن و چارەسەركرنێ دێ ب كوالیتییەكا باشتر بیت و دێ كێمتر كارتێكرن بیت ل سەر ژینگەهێ.
رۆژانە و هەتا ل رۆژێن جەژن و بێهنڤەدانێن درێژ و قەدەغەیا هاتن و چوونێ گلێش بۆ كارگەهێ دهێتە هنارتن، و ل هەر رۆژەكێ نێزیكی 600 تەنێن گلێشی ل كارگەها كاشێ دهێنە كومكرن، كو دهەمان دەم دا 28 ئامیر ل كارگەهێ دكەڤنە كاری و هەمی ژی پێدڤی ب سەخبیركرن و مەزاختنێ هەنە، لەوما ل دویف گوتنا بەرپرسێ بەشێ ژینگەهێ ل رێڤەبەرییا باژێرڤانییان ل پارێزگەها دهۆكێ پێدڤییە حكومەت چاڤدانەكا باش ل ڤی كەرتی و ڤێ كارگەهێ بكەت چونكە كەرتەكێ گرنگە و كارگەها گلێشی رۆلەكێ باش د پاقژ راگرتنا ژینگەهێ دا دیتییە.
ل سنوورێ پارێزگەها دهۆكێ سێ كارگەهێن ژئێك جوداكرنا گلێشی هەنە، دوو ژوان ل دەڤەرا كاشێ ل سنوورێ قەزا سێمێلێ نە و ئێك ژی ل دەڤەرا گردە سنە ل قەزا ئاكرێ یە.

سەجا شێرزاد - دهۆک

© 2017 Hawler