نیسان 07, 2020

سکرتێری مەکتەبی سیاسیی پارتی پیرۆزبایی لە قوتابیان و لاوان کرد

بە بۆنەی (67)ـەمین ساڵیادی دامەزراندنی یەكێتیی قوتابیانی كوردستان و یەكێتیی لاوانی دیموكراتی كوردستانەوە، جوانترین و گەرمترین پیرۆزبایی خۆمان ئاراستەی تێكڕای لاوان و قوتابیانی دڵسۆز و بە ئەمەكی كوردستان دەكەین. ئێوە جێی ئومێدی گەل و وڵاتن، هیوادارین لە سایەی هەوڵ و تێكۆشانی مەدەنییانەی خۆتانەوە، داهاتوویەكی لە ئێستا گەشتر بۆ خۆتان و نەتەوەكەتان دەستەبەر بكەن.
مێژووی دەیان ساڵی رابردووی گەلەكەمان و بزاڤی رزگاریخوازیی كوردستان گەواهیی ئەوە دەدات، كە هەردوو توێژی لاوان و قوتابیانی كوردستان، لە سەرەتای دامەزراندنی رێكخراوەكەیانەوە تا ئێستا، رۆڵی گرنگ و كاریگەر و بەرچاویان لە كاری مەدەنی و رێكخراوەییدا گێڕاوە. لە هەمان كاتدا، هەردوو رێكخراوی لاوان و قوتابیان هەردەم قوتابخانە و فێرگەیەكی كارا و نەبڕاوە بوون، بۆ پێگەیاندنی سەركردەی بە توانا و رۆڵەی هۆشیار و هەڵكەوتوو لە نێو نەتەوەكەماندا، ئەوان وەك پێشمەرگەش بەشدارییەكی چالاكانەیان لە شۆڕش و خەباتی چەكداری و رێكخستنی نهێنیدا هەبووە، ئەركیان كێشاوە و قوربانیی زۆریشیان داوە، لە رێی رزگاریی كورد و كوردستاندا شەهیدیان داوە.
لەم كاتەشدا، كە گەلەكەمان لە قۆناغی وەرچەرخاندایە بە ئاڕاستەی بەدیهێنانی خواستی زیاتر و تەواوی مافی ڕەوای خۆی، وا چاوەڕوان دەكرێت لاوان و قوتابیانی كوردستان رۆڵی كاریگەرتریان لە نەخشاندنی دواڕۆژێكی گەشتر بۆ گەلەكەمان هەبێت. هەر سەرفراز و سەركەوتوو بن.

© 2017 Hawler