نیسان 07, 2020

هەریری خزمەتێكی گەورەی پێشكەشی خەڵكی هەولێر كردووە

لە رۆژێكی وەكو ئەمڕۆدا، پارتی یەكێك لە سەركردە هەر دیارەكانی خۆی لە دەستدا، ئەویش فەرەنسۆ هەریری بوو، كە بەرەبەیانییەكی هەرە زوو لە 18ی شوباتی ساڵی 2001 كاتی چوونە سەر كار، لەلایەن تیرۆریستانەوە تیرۆر كرا.

فەرەنسۆ هەریری، لە پێناو ڕزگاریی كوردستان گیانی بەخشی، فەرەنسۆ وەكو پێشمەرگەیەك وەكو سەركردەیەك، وەک مرۆڤێکی مەزن، کوردستانییەکی بە ئایین مەسیحی، بە خەبات نیشتیمانپەروەر و دەروێشێکی خەباتکاری ڕێبازی پارتی و بارزانی بوو، پێشمەرگەیەكی دڵسۆزی ئەم نیشتمانە بوو، چ لەو ئەركانەی وەكو پارێزگاری هەولێر، كە خۆشەویست و نزیك بوو لە خەڵك، هەموو هەوڵی ئەوە بوو كە خزمەتی پایتەختی هەرێمی كوردستان بكات.
فەرەنسۆ هەریری، لە ساڵی 1937 لە شارەدێی هەریری سەر بە قەزای شەقڵاوە لە دایكبووە، لە ساڵی 1960 چووەتە شاخ و بۆتە پێشمەرگە، بەشداریی شۆڕشی ئەیلوول و گوڵانی كردووە، لە پلەی حزبیدا گەیشتە ئاستی مەكتەبی سیاسی و لە حكوومەتیشدا لە ساڵی 1996 تا 2000 پارێزگاری هەولێر بووە، جگە لەوەی پەرلەمانتاری یەكەم خولی پەرلەمانی كوردستان بووە.
شەهید فەرەنسۆ هەریری، كە هاووڵاتییەكی مەسیحیی كوردستان بوو، نموونەیەكی هەرە زیندووی پێكەوەژیانی ئاشتییانەی سەرجەم ئایین و نەتەوەكانی كوردستان بوو.
فەرەنسۆ هەریری، لە نێو وەرزشواناندا كەسایەتییەكی خۆشەویست بوو، یاریگای وەرزشی هەولێر لەسەر دەستی ئەو بنیات نراو گەورەی كرد. ئێستاش یاریگایەكە بەناوی ئەو كراوە، هەریری كۆشكی هونەریشی لە هەولێر دروستكرد.
سەباح بەیتوڵڵا، بەرپرسی لقی 9ی پارتی لە ئاكرێ، بۆ "هەولێر" گوتی:" فەرەنسۆ هەریری، یەكێك بوو لەو كادیر و پێشمەرگانەی كە لە سەرەتای شۆڕشی ئەیلوول پەیوەندیی بە ریزەكانی شۆڕش و پارتی دیموكراتی كوردستانەوە كرد. یەكێك بوو لەو قارەمانانەی كە رۆژێك لە رۆژان هەستی بە ماندووبوون و ترس نەدەکرد، بەردەوام بووە لەسەر خەبات و تێكۆشانی خۆی. بۆیە، لە دەستدانی سەركردەیەكی وەكو فەرەنسۆ هەریری خەسارەتێكی زۆر گەورە بوو، چونكە یەكێك بووە لەو كادیرانەی مەسیحی كە چەكی شەڕەف و كەڕامەتی هەڵگرتبوو، هەتا رۆژی شەهیدبوونی رۆژێك ئەو مرۆڤە بیروباوەڕی نەگۆڕاو، بیروباوەڕێكی بەهێزی هەبوو.
بەرپرسی لقی 9ی پارتی گوتیشی:" فەرەنسۆ هەریری چەندین پلەو پۆستی لەناو پارتی وەرگرتووە، لەناو حكوومەتیش پارێزگاری هەولێر بووە، یەكێك بووە لەو كەسانەی كە بەڕاستی خزمەتێكی زۆر گەورەی پێشكەشی خەڵكی پارێزگای هەولێرێ كردووە و، خەڵكی پایتەختیش ئەو شاهێدییە بۆ شەهید فەرەنسۆ هەریری دەدەن، ئێستاش خۆشەویستی ئەو سەرکردەیان لەناو دڵ و دەرووندا بە زیندوویی ماوەتەوە.
حەسەن حەدۆ، بەرپرسی لقی 26ی گوڵانی باڵەكایەتی بە "هەولێر"ـی گوت: فەرەنسۆ هەریری، كەسێكی دڵسۆز و خۆشەویستی بارزانی نەمر بوو، ئەمڕۆ لە دەڤەری باڵەكایەتی یادی ئەو شەهیدە مەزنە دەكەینەوە، چونكە بەراستی لە دەستدانی شەهید فەرەنسۆ هەریری لەو كات و ساتەدا خەسارەتێكی زۆر گەورە بوو، هەم بۆ پارتی دیموكراتی كوردستان، هەمیش بۆ خەڵكی كوردستان بەتایبەتی هاووڵاتیانی مەسیحی.
بەرپرسی لقی 26ی گوڵان لە باڵەكایەتی ئاماژەی بۆ ئەوەش كرد:" لەو ماوەی كە فەرەنسۆ هەریری پارێزگاری هەولێر بووە، ئەوەی لە توانایدا بوو بۆ ئاوەدانكردنەوەی هەولێری کرد.

© 2017 Hawler