شوبات 27, 2020

جوان رەفیق قایمقامی شەقڵاوە: شارەكانی نیشتەجێبوون كە تەواو نەكراون سیمای گەشتیاری شەقڵاوەیان تێكداوە

پێش قەیرانی دارایی حكومەتی هەرێمی كوردستان چەند پڕۆژەیەكی ستراتیژی بۆ قەزای شەقڵاوە بە ئەنجام گەیاندبوو،هەروەها لە سەردەمی قەیرانەكە وە تا ئێستاش ئەو پڕۆژەو پێداویستیانەی كە پێداویستی رۆژانە بوونە بۆ خەڵك حكومەتی جێبەجێ كردوون بەڵام هیچ پڕۆژەیەكی ستراتیژی لەو ماوەیەدا ئەنجام نەدراوە. جوان رەفیق قایمقامی شەقڵاوە لە رێگای رۆژنامەی (هەولێر)ەوە باس لەو پڕۆژانە دەكات كە لە ساڵی رابردوو ئەنجام دراون وە ئەو پڕۆژانەیكە لەم ساڵدا رەزامەندی كاركردنیان بۆ هاتۆتەوە لە لایەن حكومەتی هەرێمی كوردستان.

جوان رەفیق قایمقامی شەقڵاوە بە رۆژنامەی (هەولێر)ی ڕاگەیاند: حكومەتی هەرێمی كوردستان بە بەردەوامی ئەو پڕۆژە بچووكانەی ئەنجامداوە بۆ شەقڵاوە و نەحیەكانی سەر بە قەزاكە كە پێویستی رۆژانەی خەڵك بووە وەك بەردەوانی سیانەی پێویست و كاری رۆژانە و پەرەپێدانی بەردەوام، بەڵام لە سەردەمی قەیرانی دارایی نەتوانراوە هیچ پڕۆژەیەكی ستراتیژی بۆ قەزاكە بكرێت، لە ئێستاشدا كە دۆخی ئابووری كوردستان باشترە ئێمە پڕۆژەكانی خۆمان بە پارێزگای هەولێر و لایەنەپەیوەندیدارەكان دەدەین. بۆ ئەمساڵیش حكومەت رەزامەندی لە سەر خەرجكردنی بڕی 650 ملیۆن دینار بۆ شەقڵاوە دەربڕیووە، كە دەكرێت وەك پڕۆژەی ستراتیژی چاوی لێ بكرێت چونكە بەم بڕە پارەیە رێگاوبانی كۆلانەكانی ناو شەقڵاوە قیر دەكرێـت كە ئەمە كێشەیی چەند ساڵی رابردووی بەشێكی زۆری هاوولاتیانە

لە بارەی شارەكانی نیشتەجێبوونەوە جوان رەفیق دەڵێت: شەقڵاوە شارێكی گەشتیارییە و رۆژانە زیاتر لە (50) هەزار كەس هاتووچۆی پێدا دەكەن و بۆ چەند كاتژمێرێك دەمێننەوە، وە لە بۆنە تایبەتیەكانیش زیاتر لە (20) هەزار كەس شەوانە لە شارەكە دەمێننەوە بۆیە ئەو پڕۆژانەی بۆ نیشتەجێبوون دروست كراون و تەواو نەكراون سیمایەكی ناشیرینیان بە شەقڵاوە داوە، داواكارین یان وەبەرهێنەران تەواوی بكەن یاخوود وەزارەتە پەیوەندیدارەكان ئیجرائاتی پێویست وەربگرن، چونكە پڕۆژەكانی نیشتەجێبوون لە بنەڕەتدا بۆ شارێكی گەشتیاری پێویست نەبوون، بەڵام كە ئێستا دروست كراون و بە تەواو نەكراوەیی بە جێهێلراون سیمای شارەكەیان تێك داوە و خەریكە تایبەتمەندی شەقڵاوە ناهێلن .

قایمقامی شەقڵاوە لە بارەی پڕۆژەكانی ساڵی رابردوو دەڵێت : بارانی زۆری ساڵی رابردوو زیانێكی زۆری لە كەرتی رێگاوبانی شەقڵاوە دابوو كە بەشێك لە رێگاكان رێگای سەرەكی و بازرگانی بوون، ئەمە وایكرد ئێمە گرنگی زیاتر بەم كەرتە بدەین . بە سوپاسەوە حكومەتی هەرێمی كوردستان ساڵی رابردوو رەزامەندی لە سەر چاكردنی سەرجەم رێگاكانی سنورەكەدا كە تێچووەكەی زیاتر لە یەك ملیار دینار بوو بۆ رێگا سەرەكیەكانی شارەكە .هەروها بڕی (200) ملیۆن دیناریش بۆ كۆنكریتی بەشێك لە گەرەكان و شەقامە ناوخۆییەكانی ناو قەزاكە و نەحیەكانی سەر بە شەقڵاوە. هەروەها جگە لەم پڕۆژانەش چەندین پڕۆژەی دیكەی بچووك بە بڕی (20) یان (25) ملیۆن دینار جێبەجێكراون كە وەك پڕۆژەی پەرەپێدان سەیركراوە.

لە بارەی ئەو پڕۆژانەی كە وەبەرهێنەران یان كەرتی تایبەت داوای دەكەن لە شارەكە بیكەن ئاماژەی بەوەدا: وەبەرهێنەران داوای بە ئەنجام گەیاندنی پڕۆژە دەكەن لە شەقڵاوە بە تایبەت لە بواری گەشتیاری بەڵام لە ئێستادا حكومەتی هەرێمی كوردستان و قەزاكەش بە گوێرەی پێویست مامەڵە لەگەڵ ئەم پرۆژانە دەكات. بۆ نموونە شەقڵاوە پێویستی بە هوتێل و مۆتێل و شاری گەشتیاری نیە بۆیە ئێمە هانی وەبەرهێنەران دەدەین كە بێن پڕۆژەی تەرفیهی لە بواری گەشتیاری بكەن وەك شاری یاری و مۆل و سینەما و ئەو شتانەی كە سەرەنجی زیاتری گەشتیار ڕادەكیشێت بۆ شارەكە. بۆیە ئێستا ئێمە بە گوێرەی خواست و پێداویستی دەمانەوێت پڕۆژە ئەنجام بدرێت نەك هوتێل و موتێل كە لە ئێستادا لە شارەكە زۆرە.

لە بارەی كەرتی ئاو، كارەبا و ئاوەرۆ جوان رەفیق قایمقامی شەقڵاوە ئاماژەی بەوەدا: لە ساڵانی قەیران بارگرانی كەوتۆتە سەر ئەو كەرتانە بەڵام ئەوەی پێویست بووە بۆ هاووڵاتیان نەهێلراوە بووەستێت لە ئێستاشدا دەرخستەی تایبەتیان بۆ كراوە و دەنێردرێت بۆ لایەنی پەیوەندیدار بۆ ئەوەی كاری لە سەر بكرێت باشتر بكرێ

© 2017 Hawler