تشرینی دووەم 12, 2019

عێراق زیانی نیو ملیار دۆلاری لە بڕینی ئینتەرنێت پێگەیشتووه

بە هۆی دواین شەپۆڵی خۆپێشاندانەكانی ناڕەزایی كە بۆ ماوەی هەفتەیەك بەغدا و چەند شارێكی تری عێراقی گرتەوە، حكوومەتی بەغدا هێڵی ئینتەرنێتی بۆ ماوەیەك بڕی، لیژنەیەكی پەرلەمانی عێراقیش دەڵێ ئەم بڕینی ئینتەرنێتە بایی نیو ملیار دۆلار زیانی داوە.

لیژنەی خزمەتگوزاری لە پەرلەمانی عێراق بەیاننامەیەكی لەسەر زیانە ئابوورییەكانی بڕینی ئینتەرنێت بڵاو كردووەتەوە و تێیدا هاتووە كە عێراق زیانی نیو ملیار دۆلاری بەركەوتووە.
مەحمود تەڵاڵ بەرپرسی لیژنەی خزمەتگوزاری لە پەرلەمانی عێراق رایگەیاندووە كە بۆ ماوەی 10 رۆژ ئینتەرنێت لە شارەكانی عێراق بڕاوە، ئەمەش وایكرد زیانێكی دارایی گەورە بە هەموو كەرتەكان بكەوێت كە بە نیو ملیار دۆلار دەخەمڵێندرێ.
هەروەها ئەم بەرپرسەی لێژنەی خزمەتگوزاری دەشڵێ بە هۆی زیانەكانی بڕینی ئینتەرنێتەوە، مامەڵەكانی نێوان فەرمانگەكانی حكومەتی عێراق سستی تێكەوت و ناهاوسەنگی لە بورسەكان ڕووی دا، هەروەها ئاڵۆزیش لە كارەكانی هێڵە ئاسمانییەكان پەیدا بوو.
لەمبارەوە ڕۆژنامەی (ئەلعەرەبی ئەلجەدید)ی لەندەنی نووسیویەتی كە زیانی بڕینی ئینتەرنێـت كاریگەرییەكی زۆری لەسەر كەرتی تایبەت و كۆمپانیاكان و بانكە ئەهلیەكان هەبووە و ڕۆژانە 40 تا 50 ملیۆن دۆلار زیانی لێ داون.

© 2017 Hawler