ئەیلول 19, 2019

وەزیری کشتوکاڵ و سەرچاوەکانی ئاو: لە هەوڵداین کێشەی بەبازاڕکردنی بەرهەمی جووتیاران نەمێنێت

وەزیری کشتوکاڵ و سەرچاوەکانی ئاوی هەرێمی کوردستان سەبارەت بە کێشەی جووتیاران و بەرهەمە ناوخۆییەکان رایگەیاند، هەوڵدەدەین کێشەی بەبازاڕکردنی بەرهەمی جووتیاران نەمێنێت، دەستبەرداری سیاسەتی خۆبژێویش نابین.

لە وۆرکشۆپێکدا کە لەبارەی هەشت سێکتەری کشتوکاڵ بەڕێوەچوو، بێگەرد تاڵەبانی وەزیری کشتوکاڵ و سەرچاوەکانی ئاوی هەرێمی کوردستان ئاماژەی بۆ ئەوە کرد: "لە ئێستادا سەرقاڵی ئامادەکردنی پلانی چوارساڵەین و کاری لە پێشینەمان دابینکردنی ئاسایشی ئاوە لەگەڵ دابینکردنی خۆراکی رۆژانەیە بۆ هەرێمی کوردستان.
وەزیری کشتوکاڵ و سەرچاوەکانی ئاوی هەرێمی کوردستان لە کۆنگرەیەکی رۆژنامەڤانیدا رایگەیاند: "هەرێمی کوردستان بێ دابینکردنی ئاسایشی خۆراک ناتوانێت سەربەخۆیی خۆی بپارێزێت، بەڵێنیش بە جووتیاران دەدەین کە هەموو هەوڵێك بدەین بۆ ئەوەی بەرهەمەکانیان لە نێوخۆدا بازاڕێکی باشیان هەبێت".
ناوبراو ئاماژەی بۆ ئەوەشکرد:" لە چەند ساڵی رابردوودا بەھۆی كێشەكانی ناوچەكە و قەیرانی دارایی ئەو راستییە سەلمێنرا كە خۆبژێوی یان نیمچە خۆبژێوی بە سیاسەتی ستراتیژی ھەژمار دەكرێت، ئێمە لە وەزارەتی كشتوكاڵ بە ھیچ جۆرێك دەستبەرداری ئەو سیاسەتە نابین و گرنگی بە ئاسایشی خۆراك و ئاو دەدەین.
سەبارەت بە بەرهەمی جووتیاران و ساغکردنەوەی لە بازاڕی نێوخۆیدا رایگەیاند : "دەبێت بازاڕ بۆ بەرووبوومەکان پەیدابکەین و برەو بە پیشەسازی خۆراکی لە هەرێمی کوردستان بدەین، ئەمەش دەرگا بۆ ئەوە دەکاتەوە کە بەرهەمی جووتیاران بپارێزین و لە ئابووری کوردستان رۆڵێکی کاریگەری هەبێت".
بێگەرد تاڵەبانی دەشڵێت: "نابێت جووتیاران نا ئومێد بن، بەپەرۆشەوە لە هەوڵداین کە بەربوومەکانیان لەنێونەچێت، ئێمە پلانمان داناوە و دڵنیای دەدەین کە گرنگی بە بەربوومەکانیان دەدرێت لە ساڵی ئایندەدا لە چوارچێوەی پلانەکانی ئێمە بەرهەمەکانی خۆیان دەبیننەوە و لە بازاڕەکاندا ساخدەکرێنەوە، وەزیری کشتوکاڵ روونیشیکردەوە، گرنگە پەنجە لەسەر كەموكوڕییەكانی رابردوو دانێین، بنەمایەکی بەھێز و ستراتیجێكی روون بۆ ئایندەی كەرتی كشتوكاڵ و سەرچاوەكانی ئاو دابڕێژین، ناوبراو، پاڵپشتی سەرۆك وەزیران و جێگری سەرۆك وەزیران بۆ كەرتی كشتوكاڵ دووپاتکردەوە، بۆ ئەوەی ببێتە یەكێك لە بنەما سەرەكی و بەھێزەكانی ئابووری ھەرێمی كوردستان.
شایەنی باسە ماوەی چەند رۆژێکە بەشێک لە جووتیارانی سنووری پارێزگای دهۆک گرتە ڤیدیۆی بەروبوومەکانیان بڵاوکردەوە کە بە ئۆتۆمبێل فڕێدەدەن، ئەمەش لەبەرامبەر ئەوەی کە بەرهەمەکانیان هەرزانە و بە پارەیەکی کەم لە بازاڕدا ساخدەبێتەوە.

© 2017 Hawler