ئاب 18, 2019

تەسەیێن فسفوری ل سەر جادەیێن دهۆك دێ هێنە دانان

رێڤەبەرییا گشتی یا باژێرڤانییان ل پارێزگەها دهۆكێ و ب هەڤكاری دگەل رێڤەبەرییا هاتن و چوونا پارێزگەها دهۆكێ مژویلی ئەنجامدانا پرۆژەیێ دروستكرنا تەسەیێن دەستكردە یێن فسفوری نە.

دیار بەحری رەسول ژی رێڤەبەرێ گشتی یێ باژێرڤانییان ل پارێزگەها دهۆكێ ل دور ڤێ چەندێ دبێژیت: ئەم كار ل سەر وێ چەندێ دكەین، تەسەیێن دەستكرد ل سەر جادەیێن پارێزگەها دهۆكێ بهێنە رێكخستن و ل گورەی رێنمایێن تەكنیكی و ستاندەرێن جیهانی بهێنە دروستكرن و ل بەری هەر تەسەیەكی تابلویەك بۆ ئاگەهداربوونا شوفێری ژ تەسەێ بهێتە دانان. هەروەسا مە وەك رێڤەبەرییا باژێرڤانییان ل پارێزگەها دهۆكێ پەیوەندی دگەل رێڤەبەرییا هاتن و چوونا پارێزگەهێ كرییە و بریارە كومبوونەك تایبەت ل دور دانان و رێكخستنا تەسەییان بهێتە ئەنجام دان چونكە دانانا هەر تەسەیەكا دەستكرد پێدڤی ب بریارا رێڤەبەرییا هاتن و چوونێهەیە ژبۆ دەستنیشانكرنا جهی جهێ تەسێ ئەگەر پێدڤی بیت.
دڤی پرۆژەی دا رەنگە هەموو تەسەیێن دەستكرد بهێنە راكرن و جارەكادی ل دویف ستانداردێن جیهانی بهێنە دانان، و رێككەفتن ژی ل سەر نە بۆیاغكرنا وان تەسەیێن نوی هاتییە كرن چونكە بۆیاغ ب تنێ بۆ دەمەكێ دەستنیشانكری دمینیت و دگەل بورینا دەمی دهێتە ژێبرن، لەوما بریارە ب شێوەیەكی فسفوری بهێنە دانان داكو ژكار نەكەڤن.
فورمەك ل دویف ستانداردێن جیهانی ژلایێ رێڤەبەرییا هاتن و چوونا پارێزگەها دهۆكێ دێ هێتە چێكرن كودگەل سنوورێن باژێرڤانیێن رێڤەبەرییا گشتی یا باژێرڤانییان ل پارێزگەها دهۆكێ بگۆنجیت، و دفورمێ دا جهێ تەسەییان ژلایێ باژێرڤانییێن هەر قەزایەكی بهێتە دەستنیشانكرن و وەك راپورت بۆ رێڤەبەرییا هاتن و چوونا پارێزگەها دهۆكێ بهێتە هنارتن بۆ هندێ ڤەدیتن ژلایێ وان ڤە بۆ وان راپورتان بهێتە كرن داكو رازەمەندی ل سەر بهێتە دان.
ئەگەرێ دانانا تەسەیێن دەستكرد یێن فسفوری و دانانا تابلۆییان ئەوە شوفێر ژدوورڤە تەسێ ببینن داكو زییان ب هاولاتی وترومبێلان نە گەڤن، لەوما پێشنیار هاتییە كرن تەسە ب شێوێ فسفوری بن و تابلۆ ب دویراتییا 100 هەتا 200 مەتران ل بەری تەسێ بهێتە دانان بۆ ئاگەهداربوونێ، و ل دویف گوتنا رێڤەبەریێا هاتن و چوونا پارێزگەها دهۆكێ و رێڤەبەرییا گشتی یا باژێرڤانییان دانانا ڤان جورە تەسە و تابلوویان دێ بیتە ئەگەرێ كێم كرنا روودانێن هاتن و چوونێ دیسان رێ گرتن ل دانانا هەر تەسەیەكی بێی رازەمەندییا رێڤەبەرییا هاتن و چوونێ.

© 2017 Hawler