تشرینی دووەم 30, 2020

ئەمریكا گەورەترین كەشتی جەنگی دەنێرێتە دوورگەیەكی سەر بە یۆنان

رۆژنامەی (نیۆرك تایمز) بڵاوی كردووەتەوە، یۆنان و ئەمریكا رێككەوتوون لەسەر ئەوەی لە دوورگەی (گیریت)_ی سەر بە یۆنان، بنكەیەكی سەربازی گەورە دابمەزرێنن، بۆیە ئەمریكا لە ئاییندەیەكی زۆر نزیك گەورەترین كەشتی جەنگی دەنێرێتە ئەو دوورگەیە و ئەمەش توركیا توڕە دەكات.

بە گوێرەی گوتەی بەرپرسێكی گەورەی ئەمریكا كە قسەی بۆ نیۆرك تایمز كردووە و بەبێ ئەوەی رێگە بدات ناوی ئاشكرا بكرێت، دەڵێت ئەو كەشتییە جەنگییەی ئەمریكا دەینێرێتە (گیریت) ٦٠٠ میل لە توركیاوە دوور دەبێت و لە رۆژئاوا و باكووری دوورگەی ناوبراو جێگیر دەكرێت.
رۆژنامەی ناوبراو، باس لە هەڵوێستی توركیا دەكات، كە پێشبینی كردووە توركیا هەڵوێستی هەبێت دژی ئەمریكا، چونكە ئەم هەنگاوەی ئەمریكا پشتگیرییەكی گەورەیە بۆ یۆنان، تا توركیا نەتوانێت لە دەریای سپی بە دوای گازی سروشتیدا بگەڕێت.
رۆژنامەی (گاردیان) و چەند میدیایەكی سەر بە توركیا دەنگۆی ئەوەیان بڵاوكردەوە، كە ئەمریكا نیازی هەیە بنكەی ئینجەرلیك بگوازێتەوە بۆ دوورگەی (گیریت)، بەڵام پەنتاگۆن ئەو دەنگۆیەی بە درۆ خستەوە.
لە هەواڵەكەی نیۆرك تایمزدا هاتووە، ئەمریكا ئینجەلیك ناگوازێتەوە، بەڵام ئەم هەوڵەی ئەمریكا لەبارەی دەریای سپی كە پشتگیری لە یۆنان كردووە و ئەو كەشتییە جەنگییەش لەو دوورگەیە جێگیر بكات، توركیا نیگەران دەبێت و رەنگە بابەتی ئینجەرلیك بێتەوە بەرباس و قسەی لەسەر بكەن، چونكە پێشتریش باس لە گواستنەوەی ئەو بنكەیە كراوە.
هەروەها چەند میدیایەكی توركیاش باسیان لەوە كردووە، ئەگەر ئەمریكا بنكەیەكی گەورەی سەربازی لە (گیریت) دابمەزرێنێت، ئەو بنكەیە دەبێتە جێگیرەوەی ئینجەرلیك، چونكە لەوێوە دەتوانێت فڕۆكەی جەنگی هەڵبستێنێت و ئامانجی خۆی بپێكێت، هەروەها دەتوانێت هەر جۆرە مووشەكێكی بوێت لەوێوە ئاڕاستەی نەیارەكانی بكات.
مایك پۆمپیۆ وەزیری دەرەوەی ئەمریكا، لە كۆنگرەیەكی رۆژنامەوانیدا ئاماژەی دا، ئەوان وەكوو ئەمریكا لە هەوڵی جیدیدان تا بتوانن لە دەریای سپی ناوەڕاستدا توركیا و یۆنان بهێننە سەر مێزی گفتوگۆ، كە پێشتریش ئەڵمانیا ئەو هەوڵەی داوە.
پۆمپیۆ ئاماژەی دا، هەردوو وڵات ئەندامی ناتۆن و هاوپەیمانی ئەمریكان، بۆیە گرنگەبە زووترین كات بگەنە رێككەوتن.
بەڵام حكوومەتی یۆنان ئامادە نییە لەگەڵ توركیا لەبارەی دەریای سپی دابنیشێت، بەڵكوو پێی وایە توركیا پێشێلی مافی یۆنان كردووە لە دەریای سپی و، دەبێت بە زووترین كات كەشتییەكانی خۆی بكشێنێتەوە كە بە دوای گازی سروشتیدا دەگەڕێن.

© 2017 Hawler