تشرینی یەکەم 20, 2020

ماكرۆن: ژوانی خواردنەوەی كوپێك قاوەم لەگەڵ فەیروز هەیە

سەرۆكی فەرەنسا، ئیمانوێل ماكرۆن، لە چەند ڕۆژی داهاتوودا سەردانی لوبنان دەكات و سەرەتای گەشتەكەیشی بە خواردنەوەی قاوەیەك لەگەڵ خانمەهونەرمەندی بەناوبانگی لوبنانی فەیروز دەست پێدەكات. ماكرۆن پلانەكەی وەها داناوە كە سەرەتا لەگەڵ سیمبولێكی نیشتمانیی ئەو وڵاتە كۆ ببێتەوە كە سەرجەم پێكهاتەكانی، وەك ڕەمزێكی نەتەوەیی ڕێزی دەگرن و خۆشیان دەوێت، ئەویش فەیروزە.

 

ماكرۆن لە پرۆگرامی سەردانەكەیدا نووسیویەتی: "ژوانی خواردنەوەی كوپێك قاوە لەگەڵ فەیروز، ڕۆژی دوو شەممە، لە ئەنتڵیاس". سەردانەكەی ماكرۆن، كە ڕۆژی دوو شەممە دەست پێدەكات، پڕیەتی لە چاوپێكەوتن و دیمانەی سیاسی و ئەمەیش دووەمین سەردانی ئەم سەرۆكەیە لەم مانگەدا بۆ ئەو وڵاتە، ئەمەیش بە مەبەستی دەربازكردنی ئەو وڵاتە لە دۆخی قەیرانی سیاسی كە ڕێگرە لە پێكهێنانی "حكومەتێكی ئەركدار"، كە كۆشكی ئیلیزییە لە نووسراوێكدا ئاراستەی سیاسەتمەدارە لوبنانییەكانی كردبوو.

لەم مانگەدا حكومەتەكەی حەسان دیاب دوای تەقینەوەكە و ئەو زیانە ماڵی و گیانییانەی بەدوایەوە بوو، دەستی لەكاركێشاوە. لە ڕۆژی حەوتی مانگی ئابدا ماكرۆن یەكەم سەردانی خۆی لە لوبنان كۆتایی پێهێنا و لە تویتێكدا نووسی "خۆشماندەوێیت لوبنان"، ئەمەیش ناونیشانی گۆانییەكی بەناوبانگی فەیروزە، كە بە درێژایی 15 ساڵەی شەڕی ناوخۆیی ئەو وڵاتە، هاودەمی لوبنانییەكان بوو.

دیمانەكەی ڕۆژی دوو شەممە، دوور لە چاوی كامێراكان، هەر لە ماڵەكەی فەیروز دەبێت لە ئەتڵیاسی باكوری بەیروت.

هەڵبەت فەیروز هەر لە ساڵی 1975ـەوە پەیوەندیی پتەوی لەگەڵ دەوڵەتی فەرەنسادا هەیە و لەو ساڵەدا بۆ یەكەمجار لەسەر شاشەی تەلەفزیۆنی فەرەنسی، لەنێو بەرنامەی "سبیسیال ماتیۆ" دەركەوت، كە یەكێك لە كچەهاوڕێ فەرەنسییەكانی فەیروز بە ناوی "میرای ماتیۆ" پێشكەشی دەكرد، لەو بەرنامەیەدا گۆرانی "لە هاویندا خۆشمویستی" پەخش كرا.

ساڵی 1979 فەیروز ئاهەنگێكی گەورەی لە ئۆلۆمبیادی پاریس ساز كرد و گۆرانی "پاریس، ئەی گوڵی ئازادی"ی تێدا چڕی و ئەمەیش پەیوەندییەكەی تووندوتۆڵتر كرد.

فەیروز باڵاترین مەدالیای فەرەنسی بەدەستهێناوە، لەوانە: ڕابەری هونەر و ئاداب 1988 لە لایەن فرانسوا میتەرانەوە، مەدالیای پێشەنگی كۆرسی شەرەفمەندی 1998 لەلایەن جاك شیراكەوە.

سەرچاوە:

https://www.aljazeera.net/news/politics

 

© 2017 Hawler