نیسان 02, 2020

ئه‌مه‌ریكا.. زیاتر له‌ هه‌زار تووشبووی كۆرۆنا گیانیان له‌ده‌ستدا

كۆی گشتی ئه‌و كه‌سانه‌ی له‌ ئه‌مه‌ریكا به‌ هۆی كۆرۆنا گیانیان له‌ده‌ستداوه‌، گه‌یشته‌ سه‌رووی هه‌زار كه‌س و ژماره‌ی تووشبوانیش 68 هه‌زاری تێپه‌ڕاند.

حكومه‌تی ئه‌مه‌ریكا رایگه‌یاند، تا ئه‌مڕۆ پێنجشه‌ممه‌ 1031 كه‌س به‌ كۆرۆنا گیانیان له‌ده‌ستداوه‌ و 68 هه‌زار و 572 كه‌سی دیكه‌ش تووشی ئه‌و په‌تایه‌ بوون.

به‌ گوێره‌ی پێشبینییه‌كان ژماره‌ی تووشبووان له‌ ئه‌مه‌ریكا له‌و ژماره‌یه‌ زۆر زیاتره‌، كه‌ راگه‌یه‌ندراوه‌، به‌و پێیه‌ی هێشتا رووپێوێكی گشتگیر بۆ پشكنینی به‌ركه‌وتوانی ڤایرۆسه‌كه‌ نه‌كراوه‌ و نازانرێت چه‌ند كه‌س هه‌ڵگری ئه‌و ڤایرۆسه‌ن.

ویلایه‌تی نیویۆرك له‌ پێشه‌وه‌ی ناوچه‌كانی دیكه‌ی ئه‌مه‌ریكایه‌، له‌ رووی ژماره‌ی حاڵه‌ته‌كانی مردن و تووشبوون به‌ په‌تای كۆرۆنا و تا ئێستا 280 كه‌س له‌ شاری نیویۆرك گیانیان له‌ده‌ستداوه‌.

ژماره‌ی دانیشتوانی ئه‌مه‌ریكا 327 ملیۆن كه‌سه‌ و به‌ گوێره‌ی راپۆرتی كۆنگرێس، ئه‌گه‌ری ئه‌وه‌ هه‌یه‌ 70 تا 150 ملیۆن كه‌س تووشی ئه‌و په‌تایه‌ ببن. 

© 2017 Hawler