تشرینی دووەم 19, 2019

ئاژانسەكانی هەواڵی توركیا: قەیرانی دارایی یەكێكە لەو هۆكارانەی وا دەكات هاووڵاتیان وڵات بەجێ بهێڵن

نووسەرێكی دیاری توركیا، پێی وایە ئەوەی ئێستا لە توركیا بە هەدەپە دەكرێت، بەوەی سەرۆك شارەوانییەكانیان دوور دەخەنەوە و لە شوێنیان فەرمانبەری سەر بە دەسەڵات دادەنرێت، لە كودەتای ساڵی ١٩٨٠ كەنان ئێڤرەنیش هەر ئەوەندەی كردوە.

محەممەد یڵماز نووسەری دیاری توركیا، لە وتارێكدا كە ئەمڕۆ ٦ی ١٠ی ٢٠١٩ لە ماڵپەڕی (تیڤی 24)_ی توركی بڵاوی كردوەتەوە، رەخنەی توند لە حكوومەتی توركیا دەگرێت بە هۆی دوورخستنەوەی سەرۆك شارەوانییەكانی هەدەپە، كە بە دەنگی خەڵك بوونەتە سەرۆك شارەوانی.
ئەو دەنووسێت: ”لە كودەتایەكەی ١٩٨٠ كەنان ئێڤرەنیش كە ئەندازیاری ئەو كودەتایە بوو، سەرۆك وەزیرانی هەڵبژێراوی لە لایەن خەڵكەوە لە كار دوور خستەوە و ئەندام پەرلەمانەكان و سەرۆك شارەوانییەكانیشی لە پۆستەكەیان دوور خستەوە.
ئەو نووسەرە پێی وایە حكوومەت بۆی هەیە سەرۆك شارەوانی دوور بخاتەوە بەو مەرجەی، كە ئەو سەرۆك شارەوانییە دۆسیەكەی لە دادگا یەكلایی بووبێتەوە تاوانی كردوە یان تیرۆرستە، ئەوەی ئەكەپە بەرامبەر بە هەدەپە دەیكات بە هیچ نەزانینی یاسا و دادگایە.
هەدەپە لە هەڵبژاردنی شارەوانییەكانی ٣١ی ٣ی ٢٠١٩، توانی ٣ گەورە شارەوانی و ٥ شار و ٥٠ شارۆچكە و ١٢ ناوچە بباتەوە.
لە دوا هەڵبژاردنی پەرلەمانیشدا دەنگەكانی هەدەپە ٥ ملیۆن و ٨٦٦ هەزار و ٣٠٩ هەزار دەنگ بوە.

داوای ١٥ ساڵ زیندانی بۆ سەرۆكی شارەوانی ئامەد دەكرێت
هەفتەی رابردوو سەرۆكی شارەوانی لەكار لادراوی ئامەد لە لایەن پۆلیسەوە قۆڵبەست كرا، داواكاری گشتی ئامەدیش داوای لە دادگای تاوانەكان كردوە ١٥ ساڵ زیندانی بكەن، چونكە ئەندامی پەكەكەیە و بە نهێنی كاری بۆ كردوون.
عەدنان سەلجووق مزراكلی سەرۆكی شارەوانی ئامەد، كە ٢ مانگ بەر لە ئێستا قەیووم كرا و لە شوێنی ئەو فەرمانبەرێكی دەوڵەت دانرا، لە ١٩ی ١٠ی ٢٠١٩ش پۆلیس دەستگیری كرد و تاوەكو ئێستاش نەچوەتە بەردەم دادگا.
ماڵپەری (سۆڵ)_ی توركی بڵاوی كردوەتەوە، داواكاری گشتی ئامەد داوای كردوە مزراكلی بۆ ماوەی ١٥ ساڵ زیندانی بكرێت، بە تۆمەتی ئەوەی بە نهێنی كاری بۆ پەكەكە كردوە و ئەندامی ئەوانیشە.
دادگای ١١ی تاوانە قورسەكانی ئامەد، دۆسیەی مزراكلی قبوڵ كردوە و وەكو ئەوەی ئاژنسی (میزۆپۆتامیا) بڵاوی كردوەتەوە، لە چەند رۆژی داهاتوو مزراكلی دەچێتە بەردەم دادگا.
لە ٢٠١٨_دا ١٣٧ هەزار هاووڵاتی توركیا وڵاتیان جێ هێشتوە
لە ساڵی ٢٠١٨ لە تەواوی توركیادا ١٣٧ هەزار هاووڵاتی توركیا وڵاتیان بەجێهێشتوە، ئۆپۆزسیۆنی توركیاش پێی وایە ئەمە دەریدەخات كە هاووڵاتی توركیا بێئومێد بوونە لە ئاییندەی وڵاتەكەیاندا.
رۆژنامەی (سۆزجو)_ی توركی بڵاوی كردوەتەوە، لە ساڵی ٢٠١٨ لە تەواوی توركیادا ١٣٧ هەزار هاووڵاتی توركیایان بەجێ هێشتوە. هەروەها ئاماژەی داوە كە لە چاو ٢٠١٧ رێژەی كوچكردنی هاووڵاتیان ٢٠٪ بەرز بوەتەوە.
تۆپراك بۆ (سۆزجو) دەڵێت: ”هاووڵاتیان هیچ دڵخۆش نین بە بەڕێوەبردنی وڵات، بۆیە وڵاتی خۆیان بەجێ دەهێڵن و بەرەو ئەوروپا دەڕۆن“.
بە گوێرەی زانیارییەكانی رۆژنامەی ناوبراو، زۆربەی هاووڵاتیانی توركیا بەرەو یۆنان و مەكدۆنیا و پروتوگال دەڕۆن.
بە گوێرەی ئاژانسەكانی هەواڵی توركیا، قەیرانی دارایی یەكێكە لەو هۆكارانەی وا دەكات هاووڵاتیان وڵات بەجێ بهێڵن و بچنە ئەوروپا، چونكە بارودۆخی ئابووری خەڵك زۆر خراپە و ناتوانن بژێوی ژیانیان دابین بكەن.

© 2017 Hawler