ئاب 12, 2020

١٤ هەزار چەكداری میلیشیای (سوپای سووریای ئازاد) بەشداری ئۆپەراسیۆنی رۆژهەڵاتی فورات دەكات

رۆژنامەیەكی زۆر نزیكی ئەكەپە، زانیاری لەبارەی بەشداری پێكردنی سوپای سوریای ئازاد لە ئۆپەراسیۆنی رۆژهەڵاتی فورات دەخاتە روو. بە گوێرەی زانیارییەكانی ئەو رۆژنامەیە لە هەنگاوی یەكەمدا ١٤ هەزار چەكدار بەشداری دەكەن.

سوپای سووریای ئازاد لە لایەن توركیاوە هاوكاری لۆجیستی و سەربازی دەكرێن، توركیا بۆ داگیركردنی عەفرین رۆڵێكی گرنگی بەو سوپایەدا و، بۆ ئۆپەراسیۆنی رۆژهەڵاتی فوراتیش بە هەمان شێوە رۆڵی سەرەكی بەو سوپایە دەدات.
یوسف حەموود وتەبێژی سوپای سووریای ئازاد، لە لێدوانێكیدا بۆ رۆژنامەی (یەنی سەفەق)_ی توركی، ئاشكرای دەكات لە هەنگاوی یەكەمدا ١٤ هەزار چەكداری سوپای سووریای ئازاد بەشداری ئەو شەڕە دەكات.
حەموود لە بەشێكی تری قەسەكانیدا، ئاماژە دەدات ئەگەر پێویست بكات لە داهاتوو چەكداری زیاتر رەوانەی بەرەی شەڕ دەكەین.
گوتیشی: ”ئەو ١٤ هەزار چەكدارەی ئێمە، بەشداری شەری رەققە و حەسەكی و مەنبیج دەكەن و ئێستا بەرەو ئەو شوێنانە خۆمان ئامادە كردوە. هێزەكانی ئێمە بەرەو شانلی ئورفا رۆیشتوون و لەوێوە دەچینە ئەو شوێنەی كە بۆ ئێمە دیاری كراوە و رۆڵێكی سەرەكیمان دەبێت لەو شەڕدا“.
سوپای سووریای ئازاد، لە كاتی داگیركردنی عەفریندا، كۆمەڵكوژی و تاڵانییان زۆر كرد، تەنانەت دەستدرێژی سێكیان كردە سەر ئەو ئافرەتانەی لە عەفرین مابوونەوە.

شام و سوپای سووریای دیموكرات هەوڵی رێككەوتن دەدەن
پێ كردنی گڵۆپی سەوزی ئەمریكا بۆ توركیا تا ئۆپەراسیۆنی رۆژهەڵاتی فورات ئەنجام بدات، لە هەمان كاتدا پێ كردنی كلۆپی سەوز بوو بۆ سوپای سووریای دیموكرات كە بەشێكی زۆری ئەو سوپایە سەر بە یەپەگەن تا لەگەڵ شامدا رێك بكەون.
فەیسەل میقداد جێگری وەزیری دەرەوەی سووریا، داوای لە سوپای سووریای دیموكرات كرد كە بێنە ناو سوپای سووریاوە و ببنە بەشێك لەو سوپایە، لە لایەن سوپای سووریای دیموكراتیشەوە بە ئەرێنی وەڵامی رێككەوتن لەگەڵ شام دراوەتەوە، ئەمەش بە گوێرەی راپۆرتێكی رۆژنامەی (سۆڵ)_ی توركی.
بە گوێرەی زانیارییەكانی ئەو رۆژنامەیە، هەریەك لە ئێران و روسیا هەولی جیدی دەدەن تا بتوانن سوپای سووریای دیموكرات و شام لە یەكتری نزیك بكەنەوە و رێككەوتن ئەنجام بدەن، ئەمەش دەبێتە هۆكارێك بۆ رێگەگرتن لە هێرشی توركیا. وەكو ئەوەی بڵاوكراوەتەوە، سوپای سووریای دیموكراتیش بە ئەرێنی وەڵامی رێككەوتنی لەگەڵ ئەسەد داوەتەوە.
چەند میدیایەكی ئەمریكاش بڵاویان كردوەتەوە، بە هۆی ئەوەی ئەمریكا پشتی لە كوردەكان كرد، بۆیە رێككەوتن لەگەل ئەسەد بژاردەیەكی زۆر بەهێزە.
فەیسەل میقداد لە دیمانەیەكی بۆ رۆژنامەی (وەتەن)_ی سووری، لەبارەی هێرشی توركیا بۆ سەر رۆژهەڵاتی فورات دەڵێت: ”ئەمریكا گروپە كوردییەكانی وەڵا نا، بەڵام ئێمە رێگە نادەین خاكی سووریا داگیر بكرێت و ئامادەین پارێزگاری لە خاكی سووریا بكەین. نەتەوەی سووریا دەرگای بۆ هەموو رۆڵەكانی خۆی كردوەتەوە، بۆیە با ئەو گروپە كوردییانە لە بری بیانخەنە ناو بیرێكی قوڵەوە، با بێنەوە ناو سوپای خۆیان كە سوپای سووریایە“.

 

كارزان گلی ـ هه‌ولێر

© 2017 Hawler