ئایار 29, 2020

لە پڕۆژە یاسای ریفۆرمی دادگایی توركیادا هەدەپە هیچ حیسابێكی بۆ نەكراوە

ئەكەپە پڕۆژە یاسای ریفۆرمی دادگایی تەواو كردوە، بڕیاریشە بەر لەوەی لەناو پەرلەمانی توركیا دەنگی لەسەر بدرێت، ناوەڕۆكی پڕۆژەكە نیشانی پارتی باش و جەهەپە بدەن، بەڵام هەدەپە كە خاوەنی ٦٠ كورسی پەرلەمانە هیچ پرسێكی پێ ناكرێت.

ماوەی ساڵێك دەبێت ئەكەپە و مەهەپە بە یەكەوە ئەو پڕۆژە یاسایەیان داناوە، بەڵام شارەزایانی بواری یاسا و ئۆپۆزسیۆنی توركیا دژی ئەو پڕۆژە یاسایەن، چونكە پێیان وایە لە بەرژەوەندی دەسەڵات نووسراوەتەوە و، كودەتایە بەسەر دادگای توركیادا.
لەم هەفتەیە، پڕۆژە یاسایەكە رادەستی جەهەپە و پارتی باش دەكرێت تا بۆچوونی خۆیانی لەسەر بدەن، كە لە ٣٨ مادە پێك هاتوە.
بەڵام هەدەپە كە خاوەنی ٦٠ كورسی پەرلەمانە و دەنگەكانی لە پارتی باش و مەهەپەش زیاترە، كەچی لە پڕۆژە یاسایەكی گرنگی وەكو ریفۆرمی دادگاییدا هیچ پرسێكی پێ ناكرێت و، دەسەڵات دەڵێت هەدەپە نابێت هیچ رۆڵێكی تێدا هەبێت.
ئەگەرچی سەرەتا مەهەپە داوای لە ئەكەپە كرد، كە لەو پڕۆژە یاسایەدا (لێبوردنی گشتیشی) تێدا بێت، بەڵام ئەو داوایەی مەهەپە بۆ كاتێكی تر دوا خرا، چونكە بەشی یەكەمی پڕۆژە یاساكە ئامادە كراوە، بەشی دووەمیشی هەیە و رەنگە ماوەیەكی زۆرتری بوێت و لەوێ باس لە لێبوردنی گشتی دەكرێت.
ناوەڕۆكی پڕۆژە یاساكە لە چەند خاڵێك پێك هاتوە، بۆ نموونە ئەو كەسەی كەمتر لە ٥ ساڵ سزای بەسەردا سەپاوە، بۆی هەیە تەمیزی بڕیارەكە بكات و داوای تێهەڵچوونەوە بكات كە سزاكەی كەمتر بكرێتەوە.
هەروەها هەر پارێزەرێك ماوەی ١٥ ساڵ كاری پارێزەری كردبێت، حكوومەت بۆ ئاسانكردنی وەرگرتنی ڤیزای ئەوروپا، پاسپۆرتی شینی دەداتێ، كە بەو پاسپۆرتە دەتوانێت گەشتی ئەوروپا بكات.
هەروەها ئەوەی بیەوێت لە بەشی یاسا بخوێنێت، پێویستە بەر لەوەی بچێتە زانكۆ بە تاقیكردنەوەیەكدا تێپەڕ ببێت كە پەیوەستە بە یاساوە، ئەگەر دەرنەچوو بۆی نییە لە بەشی یاسادا بخوێنێت.
هەروەها لەمەودوا ئەوەی بیەوێت ببێتە پارێزییریش، دەبێت بە تاقیكردنەوەیەكی یاساییدا تێپەڕ ببێت.

 

كارزان گلی ـ هه‌ولێر

© 2017 Hawler