تەمموز 21, 2019

كەسایەتییەك دەیەوێت ئۆپۆزسیۆنی توركیا بكاتە ٢ بەشەوە

لە ماوەی ١٧ ساڵی رابردوودا هیچ كاتێك ئۆپۆزسیۆنی توركیا ئەوەندەی ئێستا بەهێز نەبوە بەرامبەر بە پارتی دەسەڵات، بەڵام كەسایەتییەكی ناو ئۆپۆزسیۆنی توركیا دەیەوێت ئەو بەهێزییە تێك بدات و ئۆپۆزسیۆن لاواز بكات.

 هیچ كەسێك نییە ناوی موحەڕەم ئینجەی نەبیستبێت، چونكە ئەو كاندیدی جەهەپە بوو بۆ سەرۆك كۆماری توركیا لە هەڵبژاردنی ٢٤ی حوزەیراندا، ئەگەرچی هەڵبژاردنی دۆڕاند، بەڵام وەكو كەسایەتییەكی بەهێز دەركەوت و توانی ٣٦٪ی دەنگەگان بهێنێت.
ئینجە دوای ئەوەی زانی ئەو هەموو دەنگەی هێناوە، ویستی ببێتە شوێنگرەوەی كەمال كلیچدارئۆغلو سەرۆكی جەهەپە. بۆیە كلیچدارئۆغلو سڕی كرد و تا ئاستێك نەیەهێشت لە كۆبوونەوەی جەهەپە بەشدار بێت.
ئینجە دوای هەڵبژاردنی ٢٤ی حوزەیران غروور گرتی و بە ئاشكرا كوتلەیەكی لەناو جەهەپە كۆ كردەوە و داوای بەستنی كۆنگرەیان كرد و، لەوێدا ئیدعای سەرۆك بوونی دەكرد. هەروەها ئینجە بە ئاشكرا دژایەتی خۆی بۆ كلیچدارئۆغلو دەربڕی و گوتی شایەنی ئەوەم ببمە سەرۆكی جەهەپە.
ئێستا لە رۆژەڤی توركیادا باس لە دروستبوونی ٢ پارتی تازە دەكرێت لەناو هەناوی ئەكەپەدا، كە یەكەمیان عەلی باباجانە وەزیری پێشووی دارایی توركیا، دووەمیشیان ئەحمەد داودئۆغلوە سەرۆك وەزیرانی پێشووی توركیا.
قسە لەسەر ئەوە دەكرێت كە ئەكەپە بەرەو لاوازی دەڕوات، چونكە داودئۆغلو و باباجان ٨٠ ئەندام پەرلەمانیان لەگەڵدایە، بەڵام كەس باس لە ئینجە ناكات كە ئەویش كەسایەتییەكی بەهێزی ناو جەهەپەیە و بە نیازە لێیان جیابێتەوە.
ئینجە بە ئاشكرا باس لە دروستبوونی پارت ناكات، بەڵكو ئێستاش چاوی لەوەیە ببێتە سەرۆكی جەهەپە، یاخود لە ٢٠٢٣ ببێتە كاندیدی جەهەپە بۆ سەرۆك كۆمار، بەڵام لە ئێستاوە دڵنیایی دەوێت و جەهەپەش ئاوڕی لێ ناداتەوە.
جەهەپە كار لەسەر ئەكرەم ئیمامئۆغلو دەكات بۆ ئەوەی لە ٢٠٢٣ بیكاتە كاندیدی خۆی بۆ سەرۆك كۆماری توركیا، ئەمەشی نەشاردوەتەوە و بەردەوام لە میدیاكانی خۆی باسی لێوە دەكات، چونكە دەركەوت ئەو كەسایەتییە دەتوانێت ركابەری ئەردۆغان بكات، لەو زیاتر لەناو ئۆپۆزسیۆندا هیچ سەركردەیەكی تر ناتوانێت شان لە شانی ئەردۆغان بدات.
لێرەوەیە یارییەكەی ناو ئۆپۆزسیۆن دەست پێ دەكات و ئینجە بە خۆی دەكەوێت تا بتوانێت پێگەی خۆی لەناو جەهەپەدا بپارێزێت، یاخود لێی جیا بێتەوە پارتەكە دابەش بكات.
ئینجە خۆی پێ لە ئیمامئۆغلو بەهێزترە، بۆیە لە دیمانەیەكیدا لەگەڵ رۆژنامەی (سۆزجو) دەڵێت چاوی لەوەیە ببێتە كاندیدی جەهەپە بۆ هەڵبژاردنی سەرۆكایەتی لە ٢٠٢٣، هەروەها دەڵێت ئیمامئۆغلوش خراپ نییە بۆ سەرۆكی شارەوانی و توانی بە هێزی خۆی سەربكەوێت، واتە ئەو رێگە نادات ئیمامئۆغلو ببێتە كاندیدی جەهەپە بۆ ركابەری ئەردۆغان.
وەكو ئەوەی چەند شڕۆڤەكارێكی سیاسی باسی دەكەن، ئەكەپە لە لای خۆیەوە پشتگیری لە ئینجە دەكات تا ببێتە سەرۆكی جەهەپە یان كاندید بۆ سەرۆكایەتی كۆمار، چونكە دەزانن ئینجە بە كاندیدبوونی ناتوانێت لە ئەرۆغان بباتەوە، هەروەها ئەگەر ببێتە سەرۆكی جەهەپەش هەر لە بەرژەوەندی ئەكەپەدایە.
ئەگەر ئینجە ببێتە كاندیدی جەهەپە بۆ هەڵبژاردنی سەرۆكایەتی كۆماری توركیا، ئەوكات ئەكرەم ئیمامئۆغلو نابێتە ركابەری ئەردۆغان، كە ئەكەپەش ئەوەی دەوێت. هەروەها ئەگەر ببێتە سەرۆكی جەهەپەش، بە هەمان شێوە ئینجە ئیمامئۆغلو ناكاتە كاندیدی پارتەكەی بۆ ركابەری ئەرۆدغان لە هەڵبژاردنی ٢٠٢٣، بۆیە ئەمەش هەر لە بەرژەوەندی ئەكەپەیە، بۆیە ئەكەپە بە نهێنی پشتگیری لە ئینجە دەكات بۆ بەرژەوەندی خۆی.
ئەگەرێكی تریش هەیە، ئەگەر ئینجە لە لایەن جەهەپەوە دەركرا یان بێئومێد كرا، ئەوكات پارتێكی تازە دادەمەزرێنێت، لەوێشدا ئینجە چەند ئەندام پەرلەمانێكی جەهەپەی لەگەڵدایە و بەمەش پێگەی جەهەپە لە پەرلەمان لاواز دەبێت.
پرسیار ئەوەیە، ئایە ئینجە ئەو كەسایەتییەیە تا بتوانێت بە دروستكردنی پارتێكی تازە ئۆپۆزسیۆنی توركیا دابەش بكات و خەونی دەسەڵاتیان لێ بشێوێنێت؟ یاخود كەسایەتییەكە بە دروست كردنی پارتێك و جیابوونەوەی لە جەهەپە، ئۆپۆزسیۆن هیچ زیانێكی بەر ناكەوێت و خەونی چوونە دەسەڵاتی دەكاتە دیفاكتۆ؟

 

كارزان گلی ـ هه‌ولێر

© 2017 Hawler